Loan hmangin Pepe a chhuak

Arsenal winger Nicolas Pepe chuan tun season chhung cham turin Nice chu loan hmangin a zawm. Ligue 1 club leh Gunners inrem dan chuan, a loan hun hman zawh hnuah a ngheta lei theihna tur a awm lem lo.

Kum 27 mi Pepe hian 2019 khan Lille aṭangin Arsenal hi a zawm, pound maktaduai 72 man teh meuh a nih avangin North London club player manto ber a ni a, an duh leh beisei ang erawh chuan a khel chhuak thei lem lo a ni.

Gunners tan hian inelna hrang hrangah match 112 a khel a, goal 27 a khungsak. Season hmasa khan Premier League-ah inkhel bul vawi nga chiah a ṭan a, tun season match thum an khelh tawh chinah a la inlan lo thung.

Thu chhuah siamin Arsenal chuan, "France ramah Nice tan Nico hian hun ṭha tak a hman kan duh a, a club Arsenal chuan duhsakna kan hlan," an ti a, kum 2024 thleng daih contract a neih avangin a loan hman zawh hunah a kir leh ang.

Gunners manager Mikel Arteta-a'n tlarhma lamah a duh ang player chhawr tur a nei. Tun nipui bazar laiin Gabriel Jesus leh Fabio Vieira te bakah Brazilian rawlthar Marquinhos a lalut, beisei phak lo Pepe tan hmun a awm lo.

Arteta a la bazar zo lo, Spanish star hian team ti chak thei tur lak tur an hmu fuh a nih chuan lak an la tum. Tunah hian Wolves winger Pedro Neto an la ngaihven mek a, sum an hman ngam danin a hril ang.