Allianz Stadium-ah Dybala a kir dawn

Mittui nen Paulo Dybala-a'n Juventus a chhuahsan a, a kalsan tak Allianz Stadium-ah zanin dar 10:00 hian Serie A match khel turin a kir leh dawn - Argentine forward hian AS Roma jersey a ha tawh thung ang.

Dybala hian Old Lady tan season sarih a khel hman, goal 115 khungin assist vawi 48 a nei hman bawk. Bianconeri tan hian nomawi 12 a chawi hman a, heng zingah hian Serie A nomawi panga a tel.

Juve tana a contract a hman zawh hnuah an pawt sei lo a, free transfer hmangin Roma a zawm. Jose Mourinho kaihhruaina hnuaiah Dybala hian chona thar a hmachawn chho mek a, a club hlui lakah goal khung a hreh lo ang.

Roma coach Mourinho chuan, "Tuna kan team hi chu goal nawr chi kan ni, a tirah emaw a tawp lamah emaw goal kan khung thei reng," tiin a tlarhma player-te a ringtawk hle a, tlarhnung ven thiam manager nih mah se goal nawr lam an uar dawn a ni mai thei.

Serie A match hnih an khelh tawhah Roma hi an chak ve ve a, champion tum ngam zinga mi an ni. Juve erawh an khingpui nen vawi khat an inhnehtawk tawh a, zanina an mikhual tur aiin point hnihin an hniam zawk.

Massimiliano Allegri-a'n hliam vangin Angel Di Maria an chhawr thei dawn lo, midfielder Paul Pogba, Federico Chiesa, Kaio Jorge leh goalkeeper Wojciech Szczesny te pawh an chawl mek, an ṭhat dan takin an la khel thei dawn lo.

Season hmasa lama an lei Dusan Vlahovic erawh a dam ṭha. Serbian striker hi team tana chakpui tham a ni a, zaninah pawh Juventus innghahna a ni ang.