Chelsea-in Man Utd an sawp FA Cup final-ah Chelsea Vs Arsenal

Frank Lampard-a'n a ropui tawhna ṭhin Wembley Stadium-ah FA Cup final khel turin Chelsea a hruai thleng. London club hian Inrinni zan khan tun hnaia che ṭha tak Manchester United chu inkhel thunun chungin 3-1 in an sawp. Blues hian August 1, Inrinni zanah Manchester City hnehtu Arsenal nen FA Cup nomawi an inchuh ang.

Blues tan Olivier Giroud leh Mason Mount ten goal khat ve ve an khung hnuah United captain Harry Maguire-a'n an lamah a ti lut a, Ole Gunnar Solskjaer hote tana Bruno Fernandes-a penalty chhuihluh chu mualpho lutuk tur hliah khuhna chauh a ni.

FA Cup semifinal hi United keeper David de Gea tan mangchhia tiha sawi theih a ni a, goal thum an chhuahah hian Spanish keeper hian mawh a phur vek a, United tlarhnungin an goalkeeper an thlawp ṭha lo bawk.

FA Cup semifinal hmasa zawkah champion ngun ber Arsenal-in champion lai Manchester City an hneh a, nomawi la chawi lo Lampard leh Solskjaer tan chanchin ṭha a tih theih. Chutihrualin club pahnih hian season thara Champions League khelh ngei an duh avangin FA Cup-ah an rilru zawng zawng an pe thei lo.

Lampard-a'n Norwich 1-0 a hnehtu aṭangin player pathum a thlak. Keeper Kepa Arrizabalaga, Christian Pulisic leh Reuben Loftus-Cheek te chu bench-ah dahin Willy Caballero, Reece James leh Mason Mount te khelhna hun a pe. Canaries laka goal khungtu Giroud-a'n bul ṭan mah se American midfielder Pulisic bakah N'Golo Kante te an awm loh avangin Blues ṭha ber a tih theih loh.

Solskjaer pawhin Crystal Palace hnehtute aṭangin player panga ngawt a thlak. Paul Pogba, Anthony Martial, Mason Greenwood, Scott McTominay leh Timothy Fosu-Mensah te awltirin an aiah Fred, Dan James, Nemanja Matic, Eric Bailly leh Brandon Williams te an lut. Inkhel bul ṭantute thlirin Solskjaer-a'n player ṭhate hahdam theih nan 'risk' a la a tih theih a, FA Cup a ngai pawimawh tawk lo a tih theih bawk.

Ṭan phat aṭangin inkhel a nung a, Chelsea-in bul an ṭan ṭha zawk. Reece James-a'n De Gea tan hna a siam a, Marcos Alonso erawhin a chance ṭha neih goal zawnah a tauh thei lo. United midfielder Bruno Fernandes-a'n freekick hmangin goal hmahruai khung theihna hun ṭha nei mah se Caballero-a'n a dansak.

Chelsea an chungnung zel a, goal chance ṭha bik erawh a awm meuh lo. First half tawp hma deuhin United defender pahnih Maguire leh Bailly te a intauh a, Ivorian defender hi zawn chhuah a ngaih avangin Anthony Martial luhtir a ni. Inhliam vangin injury time a rei phah a, Blues defender Zouma-a'n box chhunga ball clear turin Martial-a pet a, penalty pek a ni lo.

Hun pek belh minute 11-naah Blues-in chiang takin United tlarhnung an ṭhiat a, dinglam aṭangin vengtu nei lo Cesar Azpilicueta chuan duh thalin box chhungah a cross lut a, Olivier Giroud-a'n goal-ah a chantir. French striker vengtu Victor Lindelof-a'n a hna a thawk tawk lo a, De Gea pawhin dan theih tura ngaih a dang lo.

Second half ṭantirhah United left back Williams-a ball pet sual chu Mason Mount-a'n changin goal lam hawiin a khalh phei a, Blues rawlthar hian goal-ah petin De Gea-a'n a man sual avangin Frank Lampard-a hoten minute 46-naah 2-0 in hma an hruai der.

United-in chak duhin Pogba leh Greenwood te rawn luhtir nghal mah se eng ruai an ni lo a, Caballero tan hna an siam thei lo. Vawi hnih tisualtu De Gea-a'n ṭha zetin Giroud-a goal khung tur a dansak. United tlarhnung an insiam-

ṭha thei lo a, vei lam aṭanga Alonso cross chu Antonio Rudiger tihbuai vangin Maguire-a'n an lamah a tlawh lut - De Gea dem theih ni chiah lo mah se chet ṭhat ṭumah chuan dan theih a ni.

Chelsea substitute Callum Hudson-Odoi fimkhur loh vangin Martial lakah penalty a chawi a, Bruno Fernandes-a'n minute 85-naah goal-ah a chantir. Wembley Stadium-ah Lampard-a hote an che ṭha zawk a, tun season-a vawi thum ngawt an hneh tawh loh United chu 3-1 in an sawp.

Chelsea-in a vawi 14 nan FA Cup final an lut a, Arsenal (21) leh Man United (20) te chiah an tluk lo. Chutihrualin manager Frank Lampard-a'n player a nih laiin Chelsea hi vawi li ngawt FA Cup-ah a champion pui tawh a, manager a nih season khatnaah English football-a nomawi ngaihhlut hi chawi thei dinhmunah a ding nghal.

Blues boss Frank Lampard chuan, "Nipui bazara kan chet dan thlirin tun aia ṭha zawk hi kan la hmu chho zel dawn. Final-ah chak ngei kan duh a, kan chunga mite nen hian kan inkar tih zim zel kan tum. Hlawhtlinna chan tumin kan thawkrim a, kan elpuite thlen tawh chin enin kan tan a awlsam lo," tiin Liverpool leh Manchester City te el phak an tum thu a sawi.

Chelsea hian Ajax aṭangin pound maktaduai 36-in Hakim Ziyech an la tawh a, RB Leipzig aṭangin pound maktaduai 45-in Timo Werner an la tawh bawk. Amaherawhchu Blues season a la zo lo a, an hmabak match pawimawh pathum an khel ṭha lo a nih chuan nomawi chan thei an nih bakah season tharah Champions League khel lo thei an ni.

Lampard chuan, "Tunah chuan final pathum atan kan rilru kan pek a ngai. League match pahnih leh FA Cup final-a Arsenal kan khel tur hi a pawimawh a ni," tiin a sawi. Blues hian Premier League-ah Liverpool leh Wolverhampton Wanderers an la hmachhawn dawn a, hmabak a la harsa hle.