De Gea lamah Solskjaer a ṭang

Manchester United keeper David de Gea-a'n Tottenham Hotspur an hmachhawn ṭumin Dutch forward Steven Bergwijn ball pet chu ho lam takin a chhuah a, manager Ole Gunnar Solskjaer-a'n a chhan. Norwegian manager Solskjaer chuan Spanish keeper chu khawvela ṭha ber a nih thu a sawi.

Amaherawhchu Chelsea nen De Gea a chesual a, FA Cup nomawi an chan phah. Inkhelh banah Solskjaer chuan, "David khan vawi 100-ah vawi 100 a dang thei ang tih a inhria a, football erawh nunrawn chang a nei ṭhin. Tunah chuan a zo tawh a, theihnghilh a ngai. Keeper ṭha tak a nih bakah a rilru a huaisen," tiin a sawi. Norwegian manager chuan sawi chhunzawmin, "Match 19 chhung hneh loh kan nei lo a, Sergio Romero leh David de Gea te an khel ṭha ve ve. Crystal Palace nen goal kan chhuah lo a, David-a'n save ṭha tak tak a nei. Chelsea nen pawh vawi hnih thum kha chu ṭha takin a dang a, amaherawhchu keeper tan an tihsual thup a har ṭhin. A inrintawkna chungchang ka sawi thei lo a, a rilru erawh a huaisen," tiin a tihsual chauh ni loin a tih ṭhat a hriatsak.

England captain hlui Alan Shearer chuan, "Keeper hi vawi hnih khat an chetsual chuan rin luih a ṭha a, De Gea chunghchangah erawh a thleng zing ta hret a ni. Ka thlirna aṭang chuan Manchester United-ah Dean Henderson koh let a hun a, number 1-a dah loh pawhin khelhna hun pek a ṭulin ka hria," tiin De Gea chu rin reng tlakah a ngai tawh lo.De Gea chet chhiat zarah captain Harry Maguire chetchhiahna a langsar ta lo. England defender Maguire hian a dinpui Eric Bailly chu a tauh hliam a, an lama a tlawh luh bakah hun tawpah mangang takin ball a khalh kual a, an khingpui player a pass. Manchester United-in tlarhnung siam ṭhat nan pound maktaduai 80-in Maguire hi Leicester City aṭangin an lalut a, khawvela defender manto ber ni mah se a man phu khawpin a khel chhuak lo.

Manchester United hian July 22, Nilaini zanah West Ham an mikhual dawn a, Hammers hian an match hnuhnung pahnihah goal sarih ngawt an khung avangin Solskjaer hoten insiamṭhat an mamawh hle. Norwegian manager chuan, "Kan inzir a, hma kan sawn zel. Tun ṭumah kan tlu sawp a, Nilainiah engtin nge kan chhan let kan thlir dawn nia," tiin thawhchhuah ngei a inrinthu a sawi.