Arsenal dang thei an awm lo!
Hringnunah chuan duh ang vekin thil a thleng reng thei bik lo, chak loh chang a awm ṭhin - chetsual hnua thawh leh theih te hi a ropui lai chu a ni fo. Arsenal pawh an mikhual Fulham laka si an phurh hnuah 2-1 in an tho chhuak.
Premier League season kal laiah Gunners hian match li khel tawhin an la chak vek, anni chauh hi 100% chak record nei an ni.
Table chung bera awm Mikel Arteta nauten champion an la sawi ngam lo a nih pawhin, palina ni phak tur chuan theihna an nei tih an pholang - champion hial pawh hi?
Zinchenko awm lo
Manchester City aṭangin Arteta-a'n Gabriel Jesus leh Oleksandr Zinchenko a lalut a, an club tharah hmun pawimawh an chang nghal. League match hmasa lamah chuan an pahnih hian an inlan vek, an ṭangkai thei hle.
Fulham lakah erawh Zinchenko bakah Thomas Partey chu hliam vangin an inlan thei lo, an hmun ruakah Kieran Tierney leh Mohamed Elneny ten bul an ṭan a, anni pahnih hi tun hnaiah an khel tam lo.
Mikhual Fulham lamin striker ṭha Aleksandar Mitrovic hoin bul an ṭan, Serbian striker tharum ngah hian rin lawk leh beisei ang ngeiin Gunners tlarhnung a chhaih buai viau a, an vanneih zan ni se point thum hmu thei an ni.
Gabriel a chesual
Arsenal lamin inkhel thunun viau mah se ni dang angin an goal nawr a na tawk lo. Bukayo Saka, Jesus leh Martin Odegaard-te khung tur chu an teammate hlui Bernd Leno chuan a lo dansak vek - Gabriel Martinelli chuan corner aṭangin bar a tihper bawk.
Keeper Aaron Ramsdale leh William Saliba aṭanga bul ṭanin Gunners lamin ball an inpe kual nasa, mahse box chhunga ball an inpek luatah Brazilian defender Gabriel a chesual, a ball a hum nat tawk loh avangin Mitrovic-a'n a chhuhsak.
Mitrovic-a'n a thawhrim rah a seng a, a ball chhuhsak hi goal-ah a chantir nghal - target zawna an shot hmasa ber a lut. Tlarhnung lam an khelh ṭhat bawk avangin Marco Silva-a nauten chak beiseina an nei.
Gabriel a comeback
Arteta-a'n chak ngei ngei a duh, defender Tierney la chhuakin striker Eddie Nketiah a lalut. English hmatawng hian goal khung lo mah se tlarhma lamah a tal nasa, amah ngei pawhin hun ṭha a neih bakah midang tan remchang a siam nasa.
Goal an nawr karah captain Odegaard a rawn lang a, a shot na vak lo chu an lo danpial sak avangin a goal daih - a vannei hle. Hun tawp dawnah Gabriel-a'n buai nuaih karah chakna goal a khung zui; offside nge offside lo tia VAR hmanga en dik a nih hnuah goal-ah an pawm.
Fulham lamin hun pek belh thlengin an nawr let ngam, midfielder Nathaniel Chalobah-a'n hnai tak aṭanga a khung tur keeper Ramsdale-a'n a lo dansak hlauh a, season kal laia a vawi khat nan Fulham an tlawm.
Beiseina nei Arsenal
Arsenal hian Premier League-ah a vawi thum nan season tir lama an match hmasa paliah hnehna an chang vek. A hmasa ber chu 2003-04 kha niin season tawpah an champion, 2004-05 pawh khan vawi li chak zawnin a tawpah pahnihna an ni thung.
Mikel Arteta-a nauten an beisei phak baka ṭhain season bul an ṭan miau a, tun hma lam an sulhnu ṭha tawh pahnih ang hian thlen san leh an beisei a nih pawhin a mak lo ang, hmabak erawh an la ngah - club lian an la hmachhawn lo bawk.
Gunners manager Arteta chuan, "Stadium chhunga fans au thawm kha bengah a cham reng, anni khan min thlawp a ni satliah lo, an hmel leh aw rawlah khan beiseina an nei tih a hriat. Player lam pawhin an hna thawh tur ang takin an thawk ve thung.
"Kan match hmasa lama kan chak ai khan ka lawm zawk, a chhan chu a tir aṭanga a tawp thleng khan kan game dik tak kan khelh theih vang a ni. Kan khingpui goal bula kan chet dan leh goal khung theihna remchang kan nei hnem te kha a lawmawm," tiin a sawi.
Arsenal hian August 31, Nilaini zanah Aston Villa an mikhual dawn - kar tawpah harhtharna chang Manchester United an lenchilh zui leh dawn bawk, boruak a lum chho dawn hle.