Hmar chhak aiawh tur Biakvela leh Bobby-a

India rama tualchhung cricket player ṭha thlankhawm inelna - Duleep Trophy khel turin Mizo player pahnih thlan an ni. Mizoram bowler ṭha pahnih G. Lalbiakvela leh Bobby Zothansanga ten Northeast Zone ai an awh dawn.

Luangmual pace bowler BV-a leh Chaltlanga cheng Chanmarians spinner rinrawl Bobby te hi Mizoram senior team camp Delhi-a neih aṭanga lo haw hlim niin, September 1, Ningani hian Dimapur-a NE Zone training camp an zawm ang.

Inelna tak chu September 8, Ningani aṭangin Chennai-ah khelh a ni dawn. Duleep Trophy hi kum thum chhung BCCI calendar a telh a nih loh hnuah khelh chhunzawm a ni dawn. Zone paruka ṭhen niin North Zone, North East Zone, East Zone, Central Zone, West Zone leh South Zone te an ni.

Duleep Trophy khel tura thlan an nih hnuah Bobby Zothansanga chuan, "India ram cricketer ṭha rual khelh ṭhin kha a ni a, hei vang hian awih pawh a la har zawk. A vawikhatna a nih dawn avangin a huphurhawm ve tho mai, chutihrualin theihtawp ka chhuah dawn a, ṭha taka khelh ka tum. Team tana player pawimawh nih ngei ka tum," a ti.

Inelna sang an khelh tur thlirlawkin BV-a chuan, "North East Zone anga Duleep Trophy khelh hmasak berna tura han tel ve chu a lawmawmin a phurawm khawp mai. Season hmasaa khelhdan a zira thlan an nih ṭhin avangin team che ṭha deuh awmna zone-ah chuan player ṭha an tam tawh ṭhin hle.

"Cricket bikah chuan NE lam kan la hnufual hret a, multi day format a nih dawn bawk avangin team lian tan chance a ṭha. Mahni theihna chin a theihtawp chhuah a pawimawh a, kan theihna ṭha ber lantir turin inbuatsaih ila. A hranpa a han ṭan leh chuan vak dan a awmin ka hre lo." a ti.

Mizo player-te hian India player ṭha te hmachhawnna hun an nei dawn a, an tum tur South Zone captain Rahane niin Shaw leh Thakur bakah Shreyas Iyer, Rahul Tripathi leh Yashavi Jaiswal tihte an kawl.

Cricket Association of Mizoram honorary secretary Mamon Majumdar chuan, "BCCI in North East team anga min chhuahtir hi a lawmawm takzet. State tin aiawh thei tur player an awm vek hi thil lawmawm tak a ni bawk a, North East selector te chungah pawh kan lawm hle," tiin a sawi.

North East Zone-ah hian player tawnhriat nei ṭha zawk, pawn lam mi guest player pathum lak theih ni mah se tualchhung player hlangin an khel dawn.