City comeback-na Haaland ‘hattrick’

Erling Haaland-a theihnaah rinhlelh tur a awm lo. Norwegian striker hian minute 19 chhungin hattrick an siam a, Manchester City-in Crystal Palace laka 2-0 a an hnufual hnuah 4-2 in hnehna an chang.

Vieira hun
Patrick Vieira hoten Etihad Stadium-ah an thiampuipa Wilfried Zaha an chhawr thei lo chungin bul an ṭan ṭha. Minute lina lekah dinglam aṭanga Eberechi Eze freekick chuan John Stones-a chawn perin goal-ah a lut a, 1-0 a ni.

City tan hlauhthawnna tur awmin lang lo mah se Palace-in minute 21-naah goal hnihna an khung. Eze corner kick pet chu Joachim Andersen-a'n ṭha zetin a tauh lut a, 2-0 a ni.

Pep Guardiola hoten inkhel thunun mah se goal hnih an chhuah avangin point hloh theih dinhmunah an ding. French manager Vieira leh hoten hun chanve hmalam an hmang ṭha hle.

Haaland leh goal
City comeback theih nan Bernardo Silva a pawimawh a, Portuguese midfielder hi Etihad Stadium-ah a hlim lo niin sawi mah se minute 53-naa a goal khung vangin Etihad Stadium an hlim phah hle.

Minute 62-naah Phil Foden-a cross chu Haaland-a'n a tauh lut a, ball hmu tura Norwegian striker chevel chu hmuhnawm a tling. Inkhel hmasa lamah Foden hian Haaland hi ball ṭha a pe tawk lo a, tun ṭuma a siamsak ta hi City ṭantu tan lawmawm a tling.

Haaland-a'n goal khung thei bik a ni tih pholangin minute 70-naah Stones-a pet sual chu hnai tak aṭangin a pet goal. City-in 3-2 in hma hruai tawh mah se Haaland-a'n goal khung a tum reng. Minute 81-naah Ilkay Gundogan-a ball pangngai chu Haaland-a'n tharum hmangin box chhungah lalutin hattrick siam nan a hmang.

Norwegian striker hian City tan league match liah goal ruk a khung a, hattrrick a siam der tawh. Haaland hian a kalna apiangah goal a khung zel avangin a theihna sanzia hi pawm mai a ṭul.

Man City striker hian ram leh club tan match 148 bul a ṭanah goal 161 tehmeuh a khung a, ṭum 13 hattrick a siam. Goal khung harsatna hmun tia an sawi ṭhin Premier League-ah pawh goal a khung zel a, a la khung zel bawk ang.