Zanin aṭangin US Open 2022 Williams unau an inlan dawn

Tennis season kal laia Grand Slam hnuhnung ber US Open chu zanin aṭangin an khel ṭan dawn. New York khawpuiah tennis khel thiam an fuan khawm leh dawn a, player ropui Serena Williams tan Grand Slam hnuhnung ber a ni ang.

Grand Slam vawi 23 champion tawh Serena-i'n tun season tawp rualin tennis a chawlhsan tur thu a puang tawh a, kum 40 mi hi a u Venus Williams nen doubles huangah an khel dawn, an vanglai hmu hman tan chuan a lunglen thlak dawn.

Serena hian Thawhlehni zing dar 4:30-ah Danka Kovinic a hmachhawn dawn a, doubles match an khelh hun tur erawh tarlan a la ni lo thung. Serena leh Venus hian major doubles title ringawt pawh 14 an la thei a ni.

Fa a neih bakah hliam vangin Serena hian tun hnaiah match a khel tam tawk lo, tun dinhmunah world number 608 a ni daih a, tun ṭumah hian wildcard pek a nih avangin qualifier khelh hah ngai loin main draw atan hian a tling nghal.

Mipa world number 1 Daniil Medvedev chuan zaninah a match hmasa ber a khel nghal dawn. Arthur Ashe Stadium-ah match hmasa zawk chu dar 8:30-ah an ṭan dawn a, match hnihnaah Russian tlangval hi a inlan ang.

Russia leh Ukraina indo vangin Medvedev hian Wimbledon kha a khel thei lo. A hnu lamah erawh hard court inelna a hmachhawn thei a, tun hnaiah a ṭhat lai ber ni lo mah se US Open atan chuan rinkai ber tia sawi ngam a ni dawn.

Kum 26 mi Medvedev hian season hmasa khan US Open nomawi a chawi, player ṭha rual zinga Grand Slam nomawi chawi thei a nih avangin theihna a nei sang tih chu a chiang tawk, kuminah hian a bul ṭanna tur chu Stefan Kozlov a ni ang.

US Open 2022-ah hian Novak Djokovic chu a inlan thei dawn lo. Serbian star hian Covid-19 laka invenna vaccine a la duh lo a, hei vang hian United States a pan thei lo - a tan chuan Grand Slam champion hnem nih theihna hun ṭha a liam zel.

Australian Open-ah pawh khan Djokovic hi a inlan thei lo, season tharah pawh hian Australia ram a lut thei dawn nge dawn lo tih a la chiang chuang lo. Hetih lai hian major title lak hnem lama a um mek Rafael Nadal erawh a inlan thei dawn thung.

Grand Slam vawi 22 champion tawh Nadal hian August 31, Nilaini zing dar 4:30-ah a match hmasa ber a khel dawn a, world number 198 Rinky Hijikata nen an inhmachhawn dawn a ni.