Kha mah mah - an kim lo lehnghal!

Premier League match thum zet a zawnin an chak zo lo tawh a, an match hnuhnung bera an ngam loh phei chu Manchester United (2-1) an nih miau avangin Liverpool fan-te rilru a na.

Transfer chungchang sawi khat tak Jurgen Klopp meuh pawh Inrinni zana Bournemouth nen an intawn hmain a ṭawng chhuak a, "Midfielder kan mamawh lo tia sawitu kha ka ni a, mahse, ka dik lo a ni," a ti a, bazar lamah an mit an len tur thu a sawi.

Klopp-a ṭawngkamin a tarlan chu Liverpool dinhmun a ṭha lo a, an mangang tawh. Mahse, team ṭha an ni miau a, Reds an talbuai rei lo - Inrinni zan khan Bournemouth chuan Jurgen Klopp-a naute thinrim an tawng a, 9-0 ngawtin Reds-in an lo sawp.

Liverpool tan Roberto Firmino chuan sawiseltute ka hupsakin goal hnih leh assist vawi thum a nei a; Luis Diaz (2 goals), Harvey Elliot, Trent Alexander-Arnold, Virgil van Dijk, Chris Mepham leh Fabio Carvalho ten an khung ve bawk.

A hunah Firmino
Liverpool-in rin loh taka Fulham leh Crystal Palace an inhnehtawkpui hnuin United an ngam lo a, match thum aṭangin point hnih chiah an la nei - Sadio Mane awm loh a langsar a, Bayern Munich forward pantu hming a ri ring hle.

Palace lakah Mane thlak tura lakluh Darwin Nunez hnawhchhuah a ni a, match thum hrem a nih bawk si avangin Reds ṭantute mang a ang hle - uai thla lam tawha sawi Firmino lam hawi a ngai a, Brazilian forward hi Reds tana a hnathawh ṭhatte theihnghilhsakin, tam takin an dem hman.

Mahse, Bournemouth lakah Firmino hian a thiam a la theihnghilh lo tih a pholang a, minute 28 chhungin assist vawi thum a nei hman - Luis Diaz-a goal hmahruai tauh luh ṭha zet chu a siamsak a ni a, minute ruknaa box pawn aṭanga Elliott-a khung pawh a siamsak tho a ni.

Minute 28-naah Alexander-Arnold hun a thleng a, Firmino ball pek chu box pawn aṭangin mawi zetin a khung - sawiselna tawk nasa tak Arnold-a'n a la ṭha reng tih a pholang.

A sur zel
Liverpool-in goal thum an khung hnuah pawh duhtawk an la tum lo cheu - a ṭhiante khung tur siamsaktu Firmino chuan goal khung hna thawk vein minute 31-naah goal a khung ve leh a, corner aṭanga ball kal chu Virgil van Dijk chuan a tauh lut bawk.

Anfield-ah chawlhlawk hman a nih hmain goal nga a lut a, Liverpool khung vek a ni. Heti chung hian Merseyside club-in insum an tum lo. Second half ṭan aṭanga minute khatna lekah Chris Mepham chuan an lamah a tilut a, puih mamawh lo Liverpool a pui!

Firmino a phur laklawh - kum 30 mi striker hian Bournemouth tlarhnung buai nuai karah a goal hnihna a khung a, 7-0 a ni. Nipui transfer-a Liverpool zawmtu Fabio Carvalho-a'n Klopp-a lung a dum chhan pholangin ṭhat zetin a khung ve a, Reds tana a goal hmasa ber a ni.

Liverpool-in an duhtawk tawh mai dawna a lan laiin insum an tum lo a, Diaz chuan hun tawp nan minute nga chiah a awm tawh tihah chak nemnghehna goal a rawn khung - Carvalho leh Diaz goal khung hi bench aṭanga luhtir Konstantinos Tsimikas-a siamsak ve ve a ni.

Salah a bo!
Liverpool-in goal kua zet an khung a, mak tak maiin an goal khungtu ber Mohamed Salah chuan goal a khung ve miah lo - Reds hian Premier League-a match khata chak chian berna record chu an nihrual.

United chuan vawi hnih ngawt 9-0 a chak an lo nei tawh a, Ipswich Town (1995) leh Southampton (2021) chu 9-0 ve vein an lo hneh tawh a, Leicester City chuan 2019 khan Saints hi 9-0 thoin an lo sawp tawh bawk.

Inkhelh laiin khelmual sirah Jurgen Klopp-a'n Cherries coach Scott Parker a lo hnem a, Reds manager hian coach tana a hrehawm turzia a hriatthiampui - hetihlai hian Liverpool player-ten record thar siam ngei tumin goal khung belh an la tum cheu!

Salah vanneih zan a ni lo - goal ruakah a khung lo a, Bournemouth keeper Mark Travers-a'n ṭha zetin a dansak a, Andrew Robertson pawhin uiawm takin a hlah. Salah hi hun tawp hnaih lamah pawh a ṭhianten duhsak viau an tum a, mahse, a goal khung loh tur zana ruat sa reng emaw tih mai tur a ni - a vanneih zan ni ngat se, Reds hian goal 10 aia tam khungin record thar an siam ang.

Inkhel chhehvel
• Premier League-a an match hnuhnung vawi sarihah a zawna goal chhuah hmasa an nih hnuin Reds-in goal chhuah loin hnehna an chang.
• Liverpool-in kum 1989-a first division-a Crystal Palace an sawp hnua heti zat goal match khata an khung leh hmasak ber a ni.
• Liverpool-in vawi 19 zet shot an nei a, heng zinga 12 chu target-ah a kal.
• Bournemouth-in an match hmasa berah Aston Villa chu 2-0 in hneh mah se, an match hnuhnung pathumah goal 16 an chhuah a, Manchester City (4-0), Arsenal (3-0) leh Liverpool (9-0) ngam loin goal an khung lo vek.

Kan bul ṭan dan khan min ti lawm takzet. Bournemouth kha 5-3-2 in an rawn inrem a, Scott Parker hian he system hi a hlawhtlinpui hle - hetiang system-a khel hmachhawn hi kan châk lo a, mahse, vawiinah chuan kan talbuai phah lo. Min rawn nawr ve tak tak hmain ball kan chhuhsak zel thei a, box chhungah khan kan tam ṭhin hle!
Hmun tin aṭangin goal ropui tak tak kan khung a, chawlh kan tum lo. Chawlhlawk a nih khan 5-0 a ni der tawh a, eng team mahin hnehna an chanin insum phah an tum ngai lo - 100% a lungawi zan a, kan tawnhriatte hman ṭangkai kan duh a ni. Bul kan ṭan ṭha a, ka naute khan chawlh tum loin an bei zel a, an ti ṭha takzet. 9-0 hi chu result danglam tak a ni a, hetiang hi chu a thleng leh mai mai tawh lo ang - kan tan result pawimawh tak a ni. - Jurgen Klopp, Liverpool manager

A mak ka ti lo. Hei hi kan nihna tak chu a ni a, ka player-te hian puih an mamawh. Zanina kan chona hmachhawn hi kan tan a sang lutuk hret a, a harsa a ni. Min nawr kha kan dawl zo lo ṭhin a, club kan nihna anga thutlukna siam kan mamawh - tiang ang hun hi chu kan tawng ang tih a chiang a, hunin a hril zel ang. Kan hnual takzet a, tawnhriat nuam lo tak a ni. Ka player-te ka tawrhpui a, he kan hun tawn aṭanga kan insiamrem dan tur chu kan nihna tak pho chhuaktu a ni dawn a, chumi hna thawh chu ka tih tur a ni bawk. Hnathawh tur tam tak kan la nei a, vawiina kan tawnhriat ang tawngtu nih hi chu tumahin kan duh lo a, mahse, hei hi kan dinhmun chu a ni. Theihtawp kan chhuah ang a, eng nge kan an zel kan la hria ang chu. - Scott Parker, Bournemouth boss