Asia Cup-ah Afghanistan-in Sri Lanka an hneh

Cricket inelna Asia Cup 2022 chu Inrinni zan khan Dubai International Stadium-ah khelh ṭan a ni a, Afghanistan chuan Sri Lanka chu wicket riatin an hneh.

Kumin Asia Cup match hmasa berah hian ṭhumvawrah Afghanistan an chak a, vawm hmasak an thlang. Sri Lanka tan opener-te an che ṭha lo a; Bhanuka Rajapaksa (38), Chamika Karunaratne (31) leh Danushka Gunathilaka (17) te zarah 105 runs an siam. Afghan bowler Fazalhaq Farooqi (11/3), Mohammad Nabi (14/2) leh Mujeeb Ur Rahman (24/2) te an che ṭha a, over 19.4-ah an vawm hlum kim.

Lions target siam a sang tawk lo a, Afghan opener-te an che ṭha bawk. Hazratullah Zazai-a'n thi loin 37 runs a siam a, Ramhmanullah Gurbaz-a'n 40 runs siam bawkin over 10.1 lekah 106/2 runs siamin hnehna an chang.

Group B-ah Afghanistan leh Sri Lanka bakah Bangladesh an awm a, August 30, Thawhlehni zanah Afghanistan leh Bangladesh te an inkhel ang. Group A-ah India leh Pakistan te an awm kawp avangin ngaihven a hlawh a, cricket ram ṭha pahnih bakah hian qualifier aṭanga tling Hong Kong an awm bawk.

Asia Cup inelna hi kum 1984 aṭanga khelh ṭan kha a ni a, tun ṭum hi vawi 15-na a ni. India chu record nei ṭha ber a ni a, vawi sarih an champion tawh a, chung zingah chuan inelna neih hmasak ber ṭum leh hnuhnung ber (2018) a tel. Men in Blue hian nizan khan an hmelma Pakistan an hmachhawn a, result kan hre hman lo.