Stamford Bridge lawmna thlentu Raheem Sterling

Chelsea-in player 10-a khel chungin Leicester City 2-1 in an hneh a, Thomas Tuchel-a hoten Leeds United an hneh loh hnuah fiahna hautak an paltlang.

Stamford Bridge-a inkhelah minute 28-naah Conor Gallagher chu hnawhchhuah ni mah se Blues hian Raheem Sterling hmangin second half-ah goal hnih an khung hmasa. Foxes-in Harvey Barnes hmangin siphurh sut ṭhen mah se mualneitu an ṭang tluan

Chelsea-in Leeds an hneh loh hnuah an insiamṭha a, player 10-a an khelh hmain inkhel an thunun a, Ruben Loftus-Cheek-a'n hnai tak aṭangin a hlah. Minute 22-naah Gallagher a fimkhur tawk lo a, Foxes counter attack tur tih tawp nan Kiernan Dewsbury-Hall a titlu. English mifielder hian yellow card a hmuh tawh avangin referee tan hretthiam theih a ni lo a, yellow card vawi hnihna hmuin hnawhchhuah a ni.

Blues hi point hloh thei dinhmunah an ding a, mahse champion dan thiam tawh Sterling an kawl. Minute 47-naah Sterling-a'n mawi zetin box pawn aṭangin a hlai goal a, Man City forward hlui hian minute 63-naah a awmna hmun tur taka a awm avangin goal hnihna a khung. Sterling hi a vanneih ṭum ni se hattrick siam thei tur a ni a, goal hnih a khung inkarah hian goal ban a tih per bawk.

Chutihrualin Chelsea-in hnehna chang turin hun tawp thlengin an ṭang khawng a, Harvey Barnes-a'n minute 66-naah siphurh a sut ṭhen hnuah phei chuan an dinhmun a derthawng lehzual. Foxes tan Ayoze Perez-a'n crossbar a tih per a, goal dang lut belh tawh loin Blues-in 2-1 in hnehna an chang.