Khualmualah Man United an chak ve ta

Manchester United-in Premier League match sarih chhung khualmuala an chak loh hnuah Inrinni zan khan Southampton 1-0 a hnehin an record duhawm lo an thai reh.

St. Mary's Stadium-a goal awm chhun hi Bruno Fernandes-a khung a ni a, Erik Ten Hag-a hote match hnih an chak loh zawn hnuah a zawnin an chak.

Dutch manager Ten Hag-a'n Harry Maguire chu captain a nih avangin first eleven a nih chian bik loh thu a sawi a, Saints lakah Maguire leh Cristiano Ronaldo te bench-ah an awm.

Tlarhnungah Liverpool laka khel ṭha Raphael Varane leh player thar Lisandro Martínez te an inkawp a, Anthony Martial a inhliam avangin tlarhma lam pawh an thlak danglam lo.

Man United-in inkhel an thunun thei lo a, chutih rualin first half-ah hmahruai theihna hun ṭha an bawhpelh. Saints keeper Gavin Bazunu-a'n Elanga goal khung tur a dang a, he mi per hi Christian Eriksen-a'n goal-ah pet mah se goal line-a awm Armel Bella-Kotchap-a'n a dang.

Minute 55-naah United-in goal an khung a, goal awm chhun a nih bakah goal ṭha tak a ni. Ding lama aṭanga Diogo Dalot cross chu Fernandes-a'n goal-ah a chantir a, goal khat neih hnuah United hi a bet zawkah an ṭang tluan.

Mualneitu Southampton-in si phurh sut tumin an goal bawh a na a, keeper David de Gea pawhin Joe Aribo goal khung tur chu ṭha takin a dang.

Man United-in pound maktaduai 60-a an lakluh Casemiro chu hun tawp lamah an luhtir a, an goal neih an humhim hram bawk.

Man United hian September 1, Ningani zanah Leicester City hmachhawn turin King Power Stadium an tlawh dawn a, transfer tawp boruak laiin an inkhel dawn tihna a ni. Erik ten Hag-a hote hian September 4, Pathianni zan hian hmahruaitu Arsenal an mikhual leh ang.