Marquez tluk niah Quartararo a chak

Fabio Quartararo chuan MotoGP huangah a vawi khat nan hnehna a chang a, champion lai Marc Marquez erawh a chetsual avangin point a hmu lo - Valentino Rossi pawh khawl lam chiang lo vangin a tlan tluan thei lo a ni.

Pathianni zan khan Jerez tlan kawngah tun season bika a vawi khat nan MotoGP an tlan ṭan, thawnthu ngaihnawm leh bengverh tak tak zingah Marquez inhliam chu a langsar - July 26, Pathiannia inelna an neih leh hun atan a dinhmun a chiang lo.

Intlansiak chu

A hmasa ber aṭanga tlan ṭan Quartararo chu a tir lamah a che fuh tawk lo, palinaah tawlh hnungin Maverick Vinales chu a hmasa berah a rawn lawr. Mahse, bike ke hma lama soft tyre hmang Vinales hi lap 17-naah a tlan sir lutuk a, pathumnaah a tla hniam.

Marquez-a'n hnehna chan tumin thapui a thawh, a hmaa awm na takin nawr mah se kawng kawiah bike a thunun zo lo, kawng laia a che sual chu kawng sir thlenga sawt chhuakin a ban a hliam phah. Ṭhenkhat tana chanchin lawmawm lo a thlen laiin Quartararo erawhin minute 41 leh second 23.796 chhunga thlengin pakhatna a ni. French rider zingah tun hnai kum 21 chhungin MotoGP huanga hnehna chang leh thei hmasa ber a ni.

Inelna neih zawh a nih hnuah Marquez chuan Twitter lamah a hliam chungchang sawiin, "A chang chuan kan ruahman leh duh loh dan zawnga thil a thlen chang a awm, a pawimawh zawk chu engtiangin nge kan kir leh theih tih leh hma kan sawn dan a ni.

"Ka ban ding lam ruh tliak hi zai a ni dawn, tun hma aia ṭha zawkin a rang thei ang berin ka lo kir leh ang tih ka tiam che u," a ti. Vawiin hian Barcelona-ah a hliam hi zai a ni dawn a, a chawlh chen tur tarlan theih a la ni lo thung.

Kum 27 mi Marquez hian tun hnaiah MotoGP a thunun hneh hle, midang tan kawng a hawnsak ngai meuh lo. Kuminah erawh a bul ṭan dan a duhawm lo hle a, nomawi a kawl lai humhim tur chuan a rang thei anga rawn kir a mamawh dawn.