Bayern chelhtu Gladbach keeper Sommer

Bundesliga-ah Bayern Munich an kal fawr ta bik lo. Julian Nagelsmann-a hote hi an mual Allianz Arena-ah Borussia Monchengladbach nen 1-1 in an inhnehtawk. Bavarians hi an chhe ta duai tihna a ni lo, Gladbach keeper Yann Sommer-a'n vawi 19 zet save a nei a, Bundesliga record a siam.

Inrinni zan inkhelah Bayern tana Sadio Mane goal khung chu offside vangin pawm a ni lo a, mikhual Gladbach-in Marcus Thuram hmangin first half-ah hma an hruai. Second half-ah Bayern-in si ruk lain an nawr a, minute 83-naah Leroy Sane hmangin siphurh an sut hram - goal dang an khung belh thei lo.

Goal khat ve ve
Bayern-in inkhel an thunun a, goal khung erawh an harsat. Minute 34-naah mualneitu Bayern-in goal khungah an inngai a, Leroy Sane leh Thomas Muller thawhrah chu Sadio Mane-a'n a khung. Mahse, VAR hmanga ennawn a ni hnuah Sane hi a offside avangin pawm a ni lo.

Bavarians-in an nawr lai takin defender Dayot Upamecano a chesual a, Gladbach striker Marcus Thuram-a'n a hun ṭha neih hi hmang ṭangkaiin halfway line pelh hret aṭangin a khalh ṭan a, minute 43-naah goal pawimawh a khung.

Kum 25 mi Thuram hi FIFA World Cup 98-a France champion puitu Lilian Thuram-a fapa a ni a, Bundesliga forward langsar zinga mi ni mah se a pa erawh a tluk pha lo. Marcus hi ram tan vawi li chiah a la inlan a, Lilian erawh ram tan vawi 142 zet a khel a ni.

Bayern-in si an phurh hnuah an nawr na sawt a, goal erawh minute 83-naah an khung chauh. Substitute Jamal Musiala pass chu Sane-a'n goal kilah a lei hrulin a dah a, Yann Sommer tan dan theih a ni lo.

Chhandamtu Sommer
Glabach keeper Yann Sommer hi nipui bazara Manchester United nen pawh an sawizawm a, amah hi Switzerland international keeper niin Euro 2020 khan Spain lakah a ṭhatzia a pholang tawh a, kumin FIFA World Cup-a Italy inlan lohna chhan a tih theih bawk.

United-in Sommer hi David de Gea thachhangdawl turin an duh a, amaherawhchu a theihna thlirin bench-a awm duh tur niin a lang lo. Swiss keeper hian Bayern lakah a theihna a pholang a, vawi 19 lai save a nei.

Sommer hian kumin kumtira Hamburg goalkeeper Alexander Schwolow record siam, match khata vawi 14 save chu a khum. Glabach-in point an hlawh chhuah nan hian Sommer hi a ṭangkai lawr lak.

Bayern hian 69% ball possession an nei a, inkhel thunun satliah loin shots ringawt pawh vawi 33 a nei. Bavarians goal khung hi vawi 25 shot an neihna a ni a, goal zawna vawi 15 a kalna chiah a ni.

Mualneitu hian chak ngei an tum a, goal an khung hnuah pawh goal zawnah vawi nga an la pet. Injury time-a Swiss keeper Sommer-a'n Benjamin Pavard goal khung tur a dan chu save ṭha bik a ni a, save vawi 19 zingah holam deuh awm mah se save ṭha bik ringawt pawh hi a ṭhahnem hle.

Sommer a khel ṭha ber tih chu a chiang a, chutihrualin Gladbach midfielder Kouadio Koné a khel ṭha viau bawk. French midfielder Koné hian hmabak a nei êng a, kum 21 mi Kone hi chhinchhiah a sual lo ang.