Club record siamin Brighton an chak

Brighton & Hove Albion chuan league match kua zet chu a zawnin tlawm an nei ta lo - top flight league-ah heti zat tlawm nei loa kaltluan hi an la nei ngai lo a, Inrinni zan khan Leeds United chu 1-0 a hnehin record thar hi an siam a ni.

Mualneitu Brighton tan Pascal Gross chuan inkhela goal awmchhun a khung a, German midfielder hian minute 66-naah Leandro Trossard-a siamsak chu a ke dinglamin ṭha zetin goal-ah a khung.

Brighton hian tun season-a league match li an khelhah tlawm an la nei lo a, point 10 neiin champion lai Manchester City nen point 10 ve ve an nei.

Graham Potter-a enkawl Brighton hian an match hmasa berah Manchester United chu 2-1 in an hneh a, Newcastle United chu 0-0 in inhnehtawkpui mah se West Ham chu 2-0 in an hneh a, season bul ṭan ṭha tak Leeds an hneh leh ta.

Jesse Marsch enkawlna hnuaia indinthar mek Leeds United hi 3-0 a Chelsea sawp thei team an ni a, London club an hneh hma hian Wolverhampton Wanderers (2-1) hnehin, Southampton (2-2) an inhnehtawkpui bawk - mahse, Brighton lakah an tlawm ta a, tun season-a an tlawm hmasak ber a ni.