Newcastle player thar Isak

Premier League club hausa thar Newcastle United-in an sum neih an 'show' ṭan a, Sweden striker Alexander Isak chu Real Sociedad aṭangin an lalut - a man hi pound maktaduai 60 bawr vel nia sawi a ni.

Magpies hian Isak hma hian nipui transfer-ah Matt Targett, Nick Pope leh Sven Botman an lo lalut tawh bawk a, Eddie Howe-a enkawl team hi nizan khan Wolverhampton Wanderers nen inkhelin an result kan hre hman lo.

Kum 22 mi Isak-a'n St James' Park-a contract a ziah rei zawng tarlan a ni lo a, "hun rei tak chhung atan," tih zawngin puanzar a ni - kum nga tal chu a ziak ngeiin a rinawm.

Real Sociedad tan match 132-a goal 44 khungtu Isak chuan, "Thutlukna liantham tak a ni a, he thutlukna ka siam thei hi ka hlim hle bawk. Magpies hi club ropui tak, sulhnu ngah tak, fans nei ṭha tak an nih avangin mi zawng zawngin he club tana khelh hi an châk ang.

"Premier League pan ka châk chhan an ni a, he club hmachhawpte hian min tiphur hle bawk. Team zawm a, an khelh dan hriat hi a nuam ṭhin - Newcastle hian football hmuhnawm tak an khel niin ka hria a, he team-a tel ve hi ka duh a ni," tiin a sawi.