Forest-in Atletico defender hnaih

Nottingham Forest chuan Atletico Madrid full back Renan Lodi chu loan-in an lalut hnai a, he thuziak i chhiar meuh chuan Brazil international hi an lalut fel tawh hial mai thei.

Premier League kai thar Forest hian nipui transfer-ah player an lalut nasa hle - Lodi hi an lalut a nih chuan tun transfer-a player an lakluh 17-na tur a ni dawn tihna a ni.

Mahse, Forest hian Bordeaux aṭanga an lakluh Hwang Ui-jo chu Olympiacos lamah loan-in an kaltir lehnghal a, South Korea tan vawi 47 inlana goal 16 khungtu forward hi Premier League-ah kan hmu rih dawn lo.

Brazil tana vawi 15 inlan tawh Lodi hi kum 24 mi chauh a la ni a, season hmasa khan Atletico tan match 42 zet a khel thei - goal li a khung.

Spanish club hi July 2019 khan Brazilian club Athletico Paranaense aṭangin a zawm a, kum ruk atan contract a ziak - season thum a khel tawh a, match 118-ah goal ruk khungin assist vawi 11 a nei a, 2020-21 season khan La Liga nomawi a chawipui.

Forest hian Lodi hi an lalut thei a nih chuan loan-a hawh manah pound maktaduai 4.24 an pek a ṭul dawn a, loan hun a zawhah an duh chuan a nghetin an lalut thei ang.

Steve Cooper-a enkawl Forest hian nizan khan Tottenham Hotspur an mikhual a, an result kan hre hman lo - Spurs an tawn hma hian league match thum khelin, point li an hlawh chhuak tawh.

Hetihlai hian Atletico aṭanga loan hmanga hawh an tum Lodi hian tun season-ah Spanish club tan match khelh a la nei lo - Atletico hian zanin dar 1:30-ah league match khel turin Valencia an lenchilh dawn a, match hnih an khelh tawhah vawi khat chakin, vawi khat an tlawm.

August 26, Zirtawpni Zan
Girona 0 - 1 Celta Vigo
CEL: Iago Aspas 49'

Real Betis 1 - 0 Osasuna
REB: Borja Iglesias 34'

August 27, Inrinni Zan
Elche 0 - 1 Real Sociedad
RES: Brais Méndez 20'

Rayo Vallecano 0 - 2 Mallorca
MAL: Vedat Muriqi 13'; Lee Kang-In 64'

Almeria 2 - 1 Sevilla
ALM: Largie Ramazani 42'; Umar Sadiq 55'
SEV: Óliver Torres 30'

Nizan Inkhel (Result kan hre hman lo)
Getafe 09:00 PM Villarreal
Barcelona 11:00 PM Real Valladolid
Espanyol 01:30 AM Real Madrid

Zanin Inkhel Tur
Cadiz 11:30 PM Athletic Bilbao
Valencia 01:30 AM Atletico Madrid