Juve leh Roma inhnehtawk

Serie A champion tum pahnih Juventus leh an mikhual AS Roma te chu 1-1 in an inhnehtawk. Jose Mourinho enkawl team hian squad an thuam chak avangin club lian dang an elphak dawn, inelna ti ngaihnawmtu an ni ngei ang.

Kar tawp inkhel dangah champion lai AC Milan an chak a, an elpui leh hmelma ni bawk Inter Milan erawh Lazio lakah an mualpho. Season hmasa lam aiin Serie A nomawi inchuh boruak a ngaihnawm dawn.

Inrinni zan Allianz Stadium-a inkhelah Dusan Vlahovic chuan minute hnihna lekah a khung nghal, mikhual Roma lamin Manuel Locatelli hmanga sutah an inngai, mahse video assistant referee hman a nih hnuah goal luh hmain Vlahovic lakah an foul tih hmuh chhuah a ni a, goal hi an hnawlsak.

Second half minute 69-naah erawh Roma hian sawisel theih loh goal an khung. English striker Tammy Abraham hmangin si phurh an sut a, goal a luh theih nan Paulo Dybala a ṭangkai, point khat hlu tak an hlawh chhuak.

Chelsea striker hlui Abraham hian Serie A-ah goal 18 a khung tawh a, English mi Serie A goal khung hnem lamah Trevor Francis a nih rual chiah, ani aia khung hnem chu Gerald Hitchens (59 goals) leh David Platt (31) te chauh an ni.

Inkhel dangah AC Milan chuan Rafael Leao leh Olivier Giroud te goal hmangin Bologna 2-0 in an hneh. Champion lai hi an match hnuhnung zawkah chesual zauh mah se an tho chhuak lehnghal a, point sarih neiin table chung berah an awm leh ta.

Zirtawpni zanah Inter Milan chuan Lazio 3-1 in an ngam lo. Inter an tlawm takah chuan Serie A team 20 zingah Napoli chauh chu 100% chak ni thei an ni dawn, Naples club hi vawi hnih an chak tawh - nizana Fiorentina nen an inkhel result erawh kan hre hman lo.