Point mamawh Villa mualah Arsenal

Premier League khel chhunzawm zel turin Aston Villa tan point hmuh a pawimawh takzet a, zanin dar 12:45-a an mikhual tur Arsenal hi an boruak ṭhat lai tak a nih avang erawh chuan a awlsam lo mai thei.

Dean Smith-a enkawl Villa hi table-ah 18-na an ni mek - tla tur chinah an awm tihna a ni. Khelh zat inangah an chunga mi Watford an phak lohna chu point thum a ni a, zanina point thum an hmu thei a nih chuan an tan kawng a inhawng zau dawn.

Zanin dar 10:30 hian Watford mualah Manchester City an lenglut ve thung dawn; an inkhel result hre hmanin Villa an inlan dawn tihna a ni - Pep Guardiola nauten hnehna chang se tih chu Villa duhdan a ni ngei ang. Villa manager Dean Smith chuan, "Ka naute inkhel ngun taka ka en hian an theihtawp an chhuah tih chu ka hria, ka hmuh dan chuan kan phu tawk ang point kan hlawh chhuak ṭhin lo. Keini chuan a tawp thlengin kan bei dawn a, kan hmabak ami chu tu pawh ni se hlau leh khur chungin kan hmachhawn dawn lo," a ti.

Smith-a naute hian Arsenal hnuah West Ham an la hmachhawn leh dawn, an elpui Watford erawhin Man City hnuah Gunners an bitum a ngai ve leh thung dawn - a chung zawka awm Hornets tan thlamuan theih a la ni bik lo.

Watford-in tun hnaiah an manager Nigel Pearson an ban a, team boruak a ṭha tawk lo tih a chiang. Tun season chhungin manager pathum an banna a ni hial; Pearson hma hian Javi Gracia leh Quique Sanchez Flores te an ban tawh. Under-23 coach Hayden Mullins chuan tun season chhung team a enkawl lailawk ang.