Mizoram Lockdown (inkharkhip) Ni 121

Manchester City boss Pep Guardiola-a'n Premier League club a enkawl hmain Barcelona B, Barcelona leh Bayern Munich a enkawl hman a, German club-ah hian match 161-a enkawlah vawi 121 hnehna a chang thei. 

Nomawi aṭanga teh chuan Pep-a hlawhtlinna ber chu Barcelona a ni a, win percentage a neih sanna ber erawh Bayern niin 75.16% a tling phak hial - Bayern-ah hian season thum a cham chhungin league nomawi a chawi vek a, DFB Pokal (2), UEFA Super Cup (1) leh FIFA Club World Cup (1)-ah a champion bawk. Hetihrual hian an duh ber Champions League nomawi erawh a chawipui thei lo. 

Barcelona a enkawl laia 72.47% chak percentage nei thei Pep hian Catalan club-ah season li hun a hmang a, La Liga (3), Copa del Rey (2), Spanish Super Cup (3), Champions League (2), UEFA Super Cup (2) leh FIFA Club World Cup (2)-ah te champion nomawi a chawi thei. 

Player-a nih laia a vanglai hun zawng zawng a hmanna Barcelona-ah hian 2008-09 season khan treble champion a ni a, 2010-11 season-ah La Liga leh Champions League nomawi a chawi kawp bawk. Kum 49 mi Pep hian July 2016 khan City a zawm a, English club tan hian Premier League (2), FA Cup (1), EFL Cup (3) leh FA Community Shield (2) nomawi a chawi fel leh der tawh.

Pep hian June 2007-a Barca B team a enkawl aṭangin coach a nihna ang chuan match 679-a hmachhawn tawh a, vawi 493 chakin vawi 107 draw result a nei a, vawi 79 chiah a tlawm - a coaching career-a chak percentage a neih hi 72.61% a tling.