Chanmari FC-in Rhino Charge fiah dawn
Great Sports I Day Football-ah Mizoram Premier League club te elpui turin state pawn team pahnih chah luh an ni a, vawiin hi Rhino Charge inlan hun a ni.
Assam-a innghat army team Rhino Charge hian vawiin tlai 2:30 hian Mizoram Premier League champion Chanmari FC an hmachhawn dawn a, inkhel hmuhnawm a beisei ngam ang.
Nomawi chawi hlim
Rhino Charge hi Mahur Festival-ah Inrinni khan an champion a, Halflong-a neih inelnaah hian team 20 bawr vel an tel. Hemi hma hian army team hi Halflong-ah tho team 30 bawr vel telna Martyr's Trophy-ah an champion tawh bawk.
Nomawi pahnih chawi thei chu team naran chunglam an ni dawn tih a chiang a; amaherawhchu an inelna hmachhawn hi eng ang chiaha sang nge tih a hriat loh avangin Rhino Charge theihna hi vawiina an inkhelh hunah a hriat chauh ang.
Rhino Charge-ah Mizoram chhuak Mizo pariat zet an awm a, Aizawl FC Academy captain Lallawmawma an lakluh dawn bawk vangin pakua an awm chiah ang. Hlimen tlangval Lawmawma hi tlarhnung tichak thei tur a ni a, amaherawhchu Manipur defender tawnhriat nei ṭha pahnih Premananda Singh leh Hemen Singh te an awm tawh avangin khelhna hmun chan a awlsam lo ang.
Mizo pasarih dang chu goalkeeper PC Rema (Bethlehem VT), defender pahnih Lalneihkima (Sihphir) leh RL Puia (Bethlehem), midfielder Jessy Sailo (Kolasib) bakah forward pali Lalhmangaiha (Hlimen), Hmingthansanga (Bethlehem), Zonunsiama (Hlimen) leh L. Zama (Kolasib) te an awm bawk.
Keeper PC Rema hi SYS FC-a tuna Chanmari FC coach H. Vanlalthlanga hnuaia a awm laia army team zawm hi a ni a, Hlimen tlangval Hmangaiha hi FC RS Annexe leh Chanmari West FC tan MPL-ah a inlan tawh a, Bethlehem tlangval Hminthansanga hi Santosh Trophy-a Mizoram champion puitu Zothanpuia (Thangpuia) phirpui a ni.
Chanmari an vannei
Chanmari FC-in Mizoram Police an hneh tawh a, an inrintawk vanglai takin match khel tura la inpeih tawk lo Rhino Charge an hmachhawn dawn.
Army team hian Pathianni zan zanlai pelhah khan Aizawl an thleng chauh a, an midfielder pawimawh Gyaneshwar Singh chuan chhungkaw harsatna avangin team a zawm tlai dawn a, Chanmari a hmachhawn hman dawn lo.
MPL champion lai Chanmari FC hian vawiina hnehna an chang an nih chuan semifinal lut turin an dinhmun a ṭha dawn a, an dinhmun an sawhngheh hma chuan coach Thlanga'n a player kum naupang zawkte enchhinna hun ṭha a nei thei ang. Chanmari hian kum dang zawng aiin player an khawm naupang a ni.
Hetihlai hian Chanmari hi team ṭha tak an ni sa - Mizo winger chak ber pahnih Lalmuanzoa leh Vanlalbiaa Chhangte te an kawl a, mual sir aṭangin an tlan chakna hmangin duh tawkin an nawr thei. Tlar hmaah tawnhriat nei ṭha tawh PC Zosangliana leh player beiseiawm PC Vanlalhlimpuia te an awm.
MPL5-a CFC champion puitu player ṭhahnem tak an chhuah laiin an veng tlangval Rochhingpuia chu club tan a rinawm a, midfield aṭanga an game siamtu ber niin Police lama an goal thun pahnih hi a siamsak a ni - vawiin hian MPL club hi chak zawk tura rinkai an ni.
Group B - Team Dinhmun
July 29, Inrinni - Rajiv Gandhi Stadium
Chanmari FC 4 - 0 Mizoram Police FC
CFC : PC Zosangliana 4', 49'; Jacob Vanlalhlimpuia 20'; C Lalrosanga 53'
Chhinga Veng FC 5 - 1 Chanmari West FC
CVFC : Malsawmfela 9'; MS Dawngliana 45'; Lalmawizuala 47' (OG); Laldampuia 69', 83'
CWFC : Lalnunmawia 30'
Vawiin inkhel tur - Lammual
12:15 PM Mizoram Police FC vs Chhinga Veng FC
02:30 PM Rhino Charge vs Chanmari FC
August 3, Ningani - Lammual
12:15 PM Rhino Charge vs Chanmari West FC
02:30 PM Chhinga Veng FC vs Chanmari FC
# Team Pld W D L GF GA GD Pts
1 Chhinga Veng FC 1 1 0 0 5 1 4 3
2 Chanmari FC 1 1 0 0 4 0 4 3
3 Rhino Charge 0 0 0 0 0 0 0 0
4 Mizoram Police 1 0 0 1 0 4 -4 0
5 Chanmari West FC 1 0 0 1 1 5 -4 0