Intlansiak turin Bolt a inpeih tawh

Zirtawpni aṭangin London-ah IAAF World Championships neih ṭan a ni dawn a, khawvel hmuh chak Usian Bolt a inlan dawn. Jamaican sprinter ropui hian hnehna chan ngei a tum thu a sawi.

Olympic gold medal pakua ngawt hlawh chhuak tawh Bolt hian a tan inelna hnuhnung a nih tur thu a puang tawh a, a hun hnuhnungah hnehna hlado chham chunga sta­dium chhuahsan a tum a ni.

Kum 30 mi Bolt chuan, "Tuna ka thil tum ber chu hnehna chan a ni, hnehna chang chung ngeia chawlh ka duh," tiin Monaco-a intlansiak a hmachhawn zawhin a sawi tawh.

Kartawpa inelna lian an hmachhawn tur chung­chang sawiin Bolt chuan, "Duhthusamah chuan hnehna chan a ni, chutih rualin ka elpui te hi mi ṭha tak tak vek an nih avangin result hi sawi lawk theih a ni lo," tiin a sawi.

Olympic hnuhnung pathum Beijing, London leh Rio-ah te khan Bolt hian 100m, 200m leh 4x100m relay-ah te gold medal a hui vek. Mahse, Beijing-a inelna neih a nih ṭum hian 4x100m relay-a an team zinga pa­khat chu damdawi hman phal loh a hmang tih hmuhchhuah a ni a, hei vang hian gold medal pa­khat hi laklet sak an ni.