United-ah Matic a chiang?

Manchester United chuan Serbia midfielder Nemanja Matic lalut turin Chelsea chu inremna an neihpui hnai a, club pahnih inremna zat tur hi pound maktaduai 40 a ni. He thuziah lai thleng hian Matic-a'n United-ah contract la ziak lo mah se he thuziak i chhiar meuh chuan engkim a chiang tawh hial mai thei.

United hian nipui transfer-ah player pahnih, pound maktaduai 31 man defender Victor Lindelof leh pound maktaduai 75 man striker Romelu Lukaku-te an lalut tawh a, Matic hi nipui transfer-a an player lakluh pathumna tur a ni ang.

Chelsea manager a nih laia Matic laluttu Jose Mourinho chuan, "Keini chuan lehlam hnen aṭanga thuthar lo ngaihven hi kan tih theih awmchhun a ni tawh. Amah ngeiin lokal a duh em avangin kan lakluh ngei pawh ka ring," tiin a lo sawi tawh a, a vawi hnih nan Matic lei a tum.

Matic hi January 2011-a Chelsea-in David Luiz an lakluh dawn khan Brazilian defender man atan hian Benfica-ah kaltir a ni a, hetihlaia a hlutna an chhut zat hi pound mak­taduai nga vel a ni. Mahse, kum 2014 khan Mourinho chuan pound maktaduai 21-in Stamford Bridge-ah a hruai kir leh a, Por­tuguese manager nena an thawhdunna hi a ṭha hle.

Season hman zawh taka Chelsea-in Premier League nomawi an chawina kawngah Matic hian match 35 ngawt khel mah se Blues-in pound maktaduai 40-in Monaco aṭanga Tiemoue Bakayoko an lakluh hnuah chhuak tura sawi thawm a awm nghal a, Juventus pawhin an duh nia sawi a ni.

Chelsea-a a kir leh hnua season a hman tluan hmasak ber 2015-16-a PFA Premier League team of the year-a lang nghal thei Matic-a'n United a zawm a nih chuan pound maktaduai 89 man Paul Pogba-a'n tlarhma lamah hun tam zawk a hmang thei dawn tihna a ni a, pre-season neih mekah French midfielder hi tlarhma lamah a hmuhnawm hle.

Matic-a thiamna piahah Serbian midfielder hian France international thiamna tak tak paw chhuak thei turin a pui thei a nih chuan pound maktaduai 40-a lei hi United tan chuan man 'tlawm' tak a ni ang.