A vawi khat nan Chhinga Veng leh Police intawng dawn

MFA Super Cup champion Chhinga Veng leh MPL6 Qua­lifier champion Mizoram Police te chu an club history-a a vawi khat nan Great Sports I Day Football-ah an inhmachhawn dawn. Inkhelhna hmun tur hi Lammual a ni dawn a, chhun dar 12:15-ah an inkhel ang.

Vawi 1-na maw?

Season liam ta khan Mizoram Police chuan Aizawl DFA hnuai­ah first division league an khel a, harsatna nei loin nomawi an chawi a, MPL khel tur zawnna quali­fier-ah an chungnung leh bawk.

Chhinga Vengin a vawi khat nan MPL an khel thung a, relegate thei dinhmunah te dingin pangana niin a tawp an khar. Mizoram inelna sang bera an season khatnaah Chhingcows-in chhuan tham sulhnu an hnutchhiah lo.

Club pahnih hi division hranga an awm avangin compe­titive match-ah an la intawng lo a, vawiin hi an vawi khat intawnna tur a ni.

Police an dang

Mizoram Police hi Chanmari FC laka mualpho hlim an ni a, amaherawhchu Police hian huhang hran an nei a, dahhniam ngawt theih an ni lo.

Chhinga Veng coach Lalsang­zuala Hmar chuan, "Police hi vanduai takin MFA Super Cup semifinal-ah an chak lo a, Chanmari FC nen chak lo lehin a zawnin a chak lo. Anni chu hotu nei an ni a, a zawna vawi thum an chak lo a nih chuan player-te pawhin hremna na zawk an hmachhawn theih a rinawm. Hei vang hian khelh an hautak dawn a, kan fimkhur ang," tiin Police chu team dang an nih thu a sawi.

Mizoram Police assistant coach Laltuakliana Renthlei chuan, "Chanmari FC nen kan khel fuh tawk lo a, practice-naah kan hneh tawh avangin kan zuam sual a ni. Player inhliam kan ngah avangin tlarhnung rem phui dan kan zawng zel. Chhinga Veng hi team ṭha tak an ni a, an chak lohna pawh kan hria," tiin hneh theih a inbeisei thu Vanglaini a hrilh.

Chhingcows ṭha zawk?

Chhinga Veng hian MFA Super Cup final-ah Chanmari West 5-0 in an sawp a, I Day Football-ah West Warrior hi 5-1 in an sawp nawn. Tranfer laia thawm nei lian Chhingcows hi khelmualah pawh an tal na a, player la khawmtuten an hna an tlin a, player ṭha an theihna anga khelhtirtu coach Lalsangzuala Hmar a fakawm.

Kumin Santosh Trophy-a Mizoram kaihruaitu Sanga'n tum sang zawk a la nei a, hmasawn zel a tum. Chhinga Veng boss chuan, "Game thar khelh a châkawm a, Police lakah hian hman kan tum. Kan khelh tawh dan a lungawithlak a, amaherawhchu hma kan sawn zel loh chuan inkhel a hmuhnawm ṭhin lo," tiin Vanglaini a hrilh a, entu mipui ṭawiawmna ṭha a beisei thu a sawi tel bawk.

Chhinga Veng hian MPL club pahnih Chanmari West leh Bethlehem VT-te hmachhawn tawhin an hneh ve ve a, an hma bakah Mizoram Police, Ramhlun North, Chanmari FC, Aizawl FC leh Dinthar FC te an la awm.

Chhingcows hian Sanga hnuaiah match sarih khel tawhin an la chak vek a, chutihrualin MPL club pahnih chiah an la hmachhawn tih erawh hriat tel a ṭha thung.