Aizawl FC leh AIFF Under 19 intluktawk
Great Sports I Day Football-ah champion lai Aizawl FC-in India rama rawlthar ṭharual awmna AIFF Under 19 lakah goal an khung thei lo a, an inhnehtawk. I League champion hian an match hmasa bera Bethlehem Vengthlang FC an hneh avangin Group A hmahruaitu an ni tho a, AIFF Under 19-in point khat hmuin bul an ṭan ve bawk.
Mizo panga
AIFF Under 19 coach Floyd Pinto-a'n Mizo panga inkhel bul a
ṭantir a, defence laiah Lalliansanga a ding a, midfield laiah Zonunmawia leh Lalengzama Vangchhia te an awm a, Lalnuntluanga Bawihtlung-in vei lam kil aṭanga nawrin team captain Edmund Lalrindika chuan striker hna a chelh.
Mizo pangate hi nikuma rawn zinte tho kha an ni a, starting eleven chang zingah player pathum chiah Mizorama rawn zin lo an awm. Ramhlun South tlangval Lalawmpuia erawh AIFF Under 19 team a zawm tlai avangin bench aṭangin bul a ṭan a, hun tawp lamah a tlangnel tawhna Lammualah a rawn inlan ve bawk.
Hmuhnawm
Ṭan phat aṭangin AIFF Under 19-in inkhel nung tak an lantir nghal a, I League champion Aizawl FC-in an theihna an lantir ve bawk avangin inkhel hmuhnawm a ni.
Minute rukna lekah AIFF Under 19 tana Tluanga pet chu goal sirah a kal a, minute li hnuah William Lalnunfela'n AFC tana hmahruai theihna hun ṭha a bawhpelh bawk.
Minute 20-naah first half-a chance ṭha ber chu Fela Zote-in a hlah a, Lalremsanga'n ṭha taka a lakluh hnuah box chhungah pe letin Aizawl FC forward Fela Zote hian vengtu nei lo mah se goal zawnah a pet thei lo.
Darkar chanve hnuah AIFF Under 19-in chance ṭha a zawnin ṭum thum an insiam. Captain Edmund-a ball pet chu AFC keeper Lalawmpuia'n a dan sak a, wing back Ashish Rai ball pet chu AFC midfielder H. Lalbiakthanga'n a dang hman a, Edmund-a pass ṭha tak chu Tluanga'n goal zawnah a pet thei lo bawk.
Aizawl FC an bet rei lo, minute 37-naa H. Lalmuankima corner pet chu Fela Zote-in goal zawnah tauh mah se goalline aṭangin Zonunmawia'n a pet chhuak a, AIFF Under 19 an him hram.
Minute 45 dang
AIFF Under 19-in second half an ṭan ṭha a, left wing back Naorem Roshan Singh-a'n ṭha taka a lakluh hnuah kawh takin a pet a, keeper AwP-a'n a kut khing khatin a dan sak. Hemi hnu hian Tluanga'n captain Edmund-a tan ball ṭha bik a pe a, Lunglei rawlthar hian keeper chauh hmachhawn tawh mah se chiang takin a pet over.
First half-ah team pahnihin game rang tak an khelh avangin second half a dul hret a, Edmund-a inhliam hnuah AIFF Under 19 goal nawr a na lo sawt a, team captain aia lut Assamese rawlthar Bodo Baoringdao-a'n beisei a pha lo. Aizawl FC an dang chuang lo a, captain Alfred Kemah Jaryan-a'n I League best midfielder a ni tih a pholang thei lo a, bench aṭanga lut David Lalrinmuana'n injury time-ah a lu hmanga chakna goal khung theihna tur a bawhpelh bawk.
Hmasawnna
AIFF Under 19 coach Floyd Pinto chuan, "Nikum khan kan match hmasa berah Aizawl FC 2-0 in kan hneh lo a, tunah chuan point khat kan hmu. Kan khelh danah ka lungawi a, kan chance neih kan khung loh erawh ka ui thung. Tuna kan tum chu semifinal thlen a ni a, kan tum kan ti hlawhtlin hnuah chauh final kan thlir ang," tiin Vanglaini a hrilh.
Aizawl FC coach Rohmingthanga chuan, "Kan chance
ṭha hlah kan tuar a, kan khel ṭha thawkhatin ka hria. AIFF Under 19 an chhe lo a, naupang rual an nih avangin an che reng peih a, starting eleven chan phak tum vek an nih avangin khelh an harsa hle. Kan game-ah pawh hmasawnna hmuh tur a awm chho zel a, MFA Super Cup nena khaikhin chuan kan danglam tawh hle," tiin an khelh danah lawmna tur a awm thu a sawi ve bawk.