BVT an chak

Great Sports I Day Football-ah Bethlehem Vengthlang FC-in nimin khan Lammualah Dinthar FC 1-0 in an hneh. BVT tan hian B. Zoramthara'n minute 67-naah goal awmchhun a khung.

Chawngthansanga hote hian vawi hnih khelhah point thum hmuin table-ah pathumnaah an awm a, ni thum an awl hnuah Zirtawpni tlai hian AIFF Under 19 an hmachhawn ang a, an hmabakah an chungchiaha awm Ramhlun North an la awm bawk. Dinthar FC-in match hnihah point an hlawh chhuak zo lo a, Nilaini tlaiah pool leader Aizawl FC an hmachhawn dawn.

Nimin inkhelah BVT-in ball an chang tam a, goal erawh inkhelh hmasa lam ang thoin an harsat thung. First half-ah BVT forward B. Thara goal khung tur chu Dinthar keeper Malsawmdawngzela'n ṭha takin a dan sak a, MPL5 best keeper hian a club hlui a hmachhawn.

Team pahnihin chance ṭha an insiam thei lo a, amaherawhchu minute 67-naah player ṭha dang­lamna a lang. BVT forward Ramengmawia leh B. Thara te an inthlawp ṭha a, box pawn aṭangin College Veng tlangval Thara hian mawi zetin a khung a, goal dang a luh belh tawh lo.