Sum hmang tlem Liverpool An ngaihtuahawm dawn em?

"Liverpool ang club tan chuan Champions League khelh a ngai a ni," tih hi Reds-in an ropuina ṭhin Champions League an khel dawn tih a chian ruala Jurgen Klopp-a kam chhuak a ni a, German coach hian player ṭha hip turin Europe-a club-te inelna sang bera inlan a ṭul tih a hai lo.

Nipui transfer a inhawng ta ngei a, mahse Reds hian beisei angin sum an seng tlat lo. Tun dinhmunah chuan an elpui tur nia ngaih Manchester City (pound maktaduai 204), Chelsea (pound maktaduai 119), Manchester United (pound maktaduai 106) leh Arsenal (pound maktaduai 52)-te sum hman zat an la hmang lo vek a, sum hman tam aṭanga che ṭha tur teh tur ni ngat se chu Everton (pound maktaduai 83) pawh an tluk dawn lo tihna a ni.

Match thum chu

August 31-ah transfer bazar hun a tawp dawn a, hemi hmaa Liverpool-in Premier League-a match khelh tur an neih zat chu match thum a ni. Match thum hi 'a tam lo' tia sawi ngawt chi a ni lo. Season hmasa champion Chelsea leh pahnihna Tottenham inthlauhna kha point sarih chiah a ni a, an danglamna hi match thum aiin a tlem tihna a ni.

Liverpool hian palina ni­chung­in season khar lo ngat se chu Jurgen Klopp-a dinhmun thlengin a nghawng ang tih a chiang a, pangana Arsenal nena an inthlauhna kha point khat chiah a ni - match thumin danglamna a thlen hnem theihzia a lang. Reds hian he 'match thum' khelh tlin hmaa an squad hi a nih tur anga an 'rem' hman lo a nih chuan an tuar thei.

Players thar

Liverpool-in pound makta­duai 34 man Mohamed Salah leh pound maktaduai 10 thlenga a man sang chho thei tur Andy Robertson-te an lei tawh a, Chelsea-a a contract hmang zo tawh Dominic Solanke an lalut bawk. English striker hi kum 24 a la tlin loh avangin a man zat atana Reds in an sen tur hi court-in a la ngaihtuah leh dawn a, pound maktaduai thum vel ni tura ngaih a ni.

Reds-in player thar lakluh nan pound maktaduai 44 an seng tawh tihna a ni a, Premier League champion tum leh Champions League khel tur tan a la tawk lo. 'Tun hi bukna lung khai hun a la ni lo' kan ti a ni mai thei a, mahse 'match thum' pawimawhzia kan sawi tawh miau avangin 'champion tum' inti tan chuan league khelh

ṭan hmaa mamawh zualpui tal lo 'lei' hman hi thutlukna fing a ni ang.

Buaina chu

Reds-in player a lei tawh thlir vang vang ila, Salah hi season hmasaah AS Roma tan che ṭha viau mah se 'world class' huang chhunga dah tur chuan a la harsa a, Andy Robertson hi Championship lama Hull City relegate puitu a ni a, Solanke hi FIFA U20 World Cup khelh zawh taka best player ni mah se Premier League-a la enchhin loh striker a ni bawk.

Liverpool player lei tawhte hi champion pui tham an ni em? tih zawhna inpe ta ila, a chhanna chu 'Aih' tih hi a ni rih - hei tak hi Reds tana buaina tur chu a ni a, a awlsam zawnga sawi chuan Liverpool hian player dang lak belh an la mamawh takzet a ni, tih hi a ni mai.

Engtin zel?

Liverpool hi an player lei thar chauh en loa an squad pumpui thlir erawh chuan 'an ṭha tawk' tiin huaisen takin a sawi ngam. Tlarhmaah Barcelona hellai Philippe Coutinho a chhuak lo a nih chuan Brazilian midfielder hi Roberto Firmino, Sadio Mane leh Salah-te nen an inkawp dawn tihna a ni a, eng club tan pawh anni pali inkawp hi hmachhawn an chakawm loh ang.

Reds buaina erawh tlarhnung a ni a, an tlarhma hi chu season hmasaah pawh club dang tan buapui tham an ni tawh. Player pali kan tarlante hi inhliam pawh ni se Daniel Sturridge, Divock Origi, Danny Ings, Adam Lallana leh Solanke an la nei cheu.

Tlarhnung buaina

Liverpool boss Klopp-a'n tlarhnung lam buaina a hai bik lo. Transfer bazar inhawn rualin Southampton captain Virgil van Dijk a vil nghal chat a, Chelsea leh Manchester City pawhin an duh defender hian Anfield pan a duh thu a tichiang bawk. Mahse, Saints-in an defender hi Reds in an phalna loin an lo dawr niin an sawi a, Liverpool an inhnukdawk nghal - tun hnaia thu tharah erawh Reds hian pound maktaduai 70 man vel ni tura ngaih defender hi an la ngaihven reng.

Reds buaina pakhat chu RB Leipzig midfielder Naby Keita hi a ni. Liverpool hian kum 22 mi midfielder hi lakluh tumin pound maktaduai 67 nen German club hi dawr mah se an dawrna hi hnawl a ni a, coach Ralph Hasenhuttl chuan, "Ka player hi 100%-in a chhuak lo ang tih ka sawi ngam," tiin season hmasaa goal riat khunga assist vawi sarih nei thei a player pawimawh chhuah loh tur thu a sawi - Reds erawh an la beidawng chuang lo.

Ta se...

Klopp-a'n player pathum a lalut tawh a, Van Dijk leh Keita hi lalut bawk se chuan khaw dang a hawi a rinawm tawh lo. Chuti a nih chuan Liverpool hi eng angin nge an inrem ang? tih hi thil hriat chakawm chu a ni. Klopp-a'n season hmasaah 4-2-3-1 formation a ngainat zia hmuh turin a awm tawh a, tun season-ah pawh he formation tho hi a hmang ngun tura ngaih a ni.

Simon Mignolet chu Reds tan si ban nghak tura ngaih a ni a, tlarhnungah Nathaniel Clyne, Van Dijk, Joel Matip leh James Milner dinghoin midfield laiah Jordan Henderson leh Keita, mual sir lamah Salah leh Mane, striker hnung chiahah Coutinho awmin tlarhmaah Firmino a mal tlat ang. Hetianga Reds hi an inrem a nih chuan bench-ah Sturridge, Adam Lallana, Georginio Wijnaldum leh Dejan Lovren te ho an awm thei dawn tihna a ni - champion thei zing aṭanga thaibo chu thil harsa tak a nih tawh a rinawm.