Vettel-a'n a hmahruaina sawh nghet

Pathianni zana tlan zawh tak Hungarian Grand Prix-ah Sebastian Vettel chuan hnehna changin Formula 1 driver championship hmahruaitu a nihna a sawh nghet.

Intlansiak ṭan tirh aṭangin pole position aṭanga bul ṭantu Ferrari driver Vettel-a'n har­satna a nei lo a, lap 70 chu dar­kar khat leh minute 39 bakah second 46.713 hun a hmang a, a hnungchiaha a temmate Kimi Raikkonen a thleng thung - an inkarah second 0.9 chiah a awm.

German tlangval Vettel hian Formula 1 intlansiak a hmachhawn tawhah vawi 46 hnehna a channa chiah a ni a, tun season championship-ah point 202 hmuin Lewis Hamilton aiin point 14 in an sang fal rih mek.

Kum 2004 khan Hungary GP-ah hian Michael Schuma­cher leh Rubens Barrichello te chu pakhatna leh pahnihna an ni tawh a, hemi hnuah Vettel leh Raikkonen te hi he hmuna Ferrari driver hetiang dinhmun luah leh thei hmasa ber an ni.

World champion vawi li ni tawh Vettel chuan, "Inelna hautak tak a ni, bul ka ṭan fuh avangin ka dinhmun ka siam-ṭha a, intlansiak hun tam zawkah kha chuan Raikkonen kha a tlan ṭha zawk," tiin a teammate a dahsang thiam hle.

Ferrari hnungah Mercedes

Season hmasa Formula 1 team leh driver championship thununtu Mercedes driver ten tun season-ah Ferrari driver Vettel an elphak rih meuh lo. British driver Hamilton hi palina a ni a, lap 45-na an tlan laia rawn lehpeltu Valtteri Bottas chu pathumna a ni thung. An elpui Ferrari driver pahnih hnung chiaha a indawta intlar hi Mercedes team tan result ṭha a ni lo ang.

Tun season aṭanga Mer­cedes car khalhtu Bottas chuan, "Lewis khan hun ṭha min siamsakah ka ngai, podium ka lawn theih nan kawng min sial sak bakah driver ṭhenkhat min dan sak a ni," tiin a sawi. Hamilton hian tun hmain a teammate-te nen boruak ṭha lo a nei zuah zauh tawh a, tun season-ah erawh Bottas nen boruak ṭha lo an la nei lo.

World champion vawi thum ni tawh Hamilton chuan, "Season ṭan dawn khan dik leh felfai taka champion ka duh thu ka sawi tawh a, ka dinna ngaiah ka la ding reng. Motor intlansiakah chuan intihpalh awm thei a ni a, kuminah erawh midang tipalhtu ni loin tihpalh tuartu ka ni fo tawh zawk, heti chung hian championship-ah pahnihna ka ni thei," tiin a dinhmuna a lungawi tawk thu a sawi.

Red Bull an buai?

Rawlthar duhawm Max Verstappen chu lap hmasa berah Red Bull car khalhtu Daniel Ricciardo a tihpalh avangin hremna pek a ni a, heti chung hian panganaah a thleng thei tho.

Ricciardo chuan inelna ṭan tirh maia a teammate-in har­­satna a siamsak chu a hre thiam lo hle, "A tira bul kan ṭan fuh loh chuan a tawp thlengin kan hnufual tawh a, thil a harsa vek tawh ṭhin a ni," a ti. Hetihlai hian Verstappen pawh­in a tihsual a ni tih a pha lo a, ngaihdam a dil zui ve bawk.

Kum 36-na piancham pawmtu Fernando Alonso-a'n beisei phak bakin a tlan ṭha a, McLaren driver hi paruknaah a thleng. Force India driver pahnih Sergio Perez leh Esteban Ocon te pawh pariatna leh pakuanaah thlengin season duhawm an hman chhunzawm zel bawk.