Women's Euro Germany barakhaihtu Denmark

Women's European Championship khelh mekah semifinal khel tur a hriat kim ta. A zawna a vawi sarih nana champion tum Germany chu Denmark-in barakhaihin an beiseina an tih thamral sak a, 2-1 in an hneh.

Kum 1993 hnua Euro nomawi la chawi char char Germany hmeichhe team tan Isabel Kerschowski chuan minute thumna lekah goal hmahruai khung mah se Denmark hian second half-ah Nadia Nadim leh Theresa Nielsen hmangin an chhanglet a, hnehna an chang ta a ni.

Denmark hian Spain hnawtchhuaktu Austria chu August 3 zan dar 10:30-ah semifinal an khelhpui ang. Austria hian hun pang ngaia Spain an inhnehtawkpui hnuah penalty hmangin 5-3 in quarterfinal-ah an hneh.

English football-in hun duhawm a tawng mek zel. Tun hnai age level lama result nei ṭha tak England hian hmeichhe team lamah pawh result duhawm neiin France chu quarterfinal-ah 1-0 in an hneh ve bawk a, Lionesses (England hmeichhe team sawina) goal awmchhun hi Jodie Taylor khung a ni.

England hian Au­gust 3 zan dar 1:15-ah 2-0 a Sweden hnehtu Netherlands hmeichhe team an hmachhawn ang. Dutch hmeichhe team tan hian winger Lieke Martens leh Arsenal hmeichhe team lakluh thar Vivianne Miedema-te chuan goal khat ve ve an khung.