Roma lakah Juve an chungnung

Italian champion Juvnetus chuan season thar inbuatsaih nana United States-a an zin chhuahnaah AS Roma an hmachhawn a, Turin club hian season hmasaa an mahni elphak team hi penalty shootout-ah 5-4 in an hneh.

Pathianni zan International Champions Cup inkhelah Juve tan first half-a striker Mario Mandzukic goal khung chu hun tawp hma minute 16 chauh a awm tawh tihah season hmasa Serie A top scorer Edin Dzeko-a'n a sut a, goal dang a lut zui tawh lo.

Juventus hian tun hnaiah a zawnin season ruk chhung chu Serie A nomawi an chawi tawh a, keeper Gianluigi Buffon chuan club dang hmalak dan a thlirin an tan season tharah league nomawi humhim a harsat tur thu a sawi.

Season hmasaa parukna AC Milan chu Italian club zinga transfer bazar-a che na ber an ni mek - Leonardo Bonucci, Lucas Biglia, Andre Silva, Hakan Calhanoglu, Andrea Conti, Ricardo Rodriguez, Mateo Musacchio, Franck Kessie leh Fabio Borini te an laut tawh a, an la duhtawk lo.

Roma-in season hmasa a nomawi an chawi lohna chu point li chiah a ni a, an ban phakah nomawi a awm tih an hria. Rick Karsdorp, Cengiz Under, Aleksandar Kolarov, Maxime Gonalons, Lorenzo Pellegrini leh Hector Moreno te an neih belh tawh bawk. Napoli leh manager thar Luciano Spalletti kaihhruaina hnuaia harhtharna chang Inter Milan chu sawi hmaih an thiang lo bawk ang.

Juve legend Buffon chuan, "Milan, Roma leh Napoli bakah Inter ten team an indin thar a, sum an hmang huaiin an thawkrim hle bawk. Kan tan title humhim chu hna awlsam a ni dawn lo. Chutihrualin kan team pawh kan inthuam chak ve bawk a, club dang chet dan avanga zam tur erawh kan ni lo ang," a ti.

Turin club hian Inrinniah Tottenhman an hmachhawn dawn a, chumi hnuah season thar inbuatsaihna match hnuhnung ber atan August 13 hian Lazio nen Supercoppa Italiana an inchuh ang.