Nigeria-ah Indian shuttler hlawhtling
Kartawpa Lagos International khelh zawh takah Indian shuttler an cheṭha hle, mipa singles leh double nomawi an hlawh chhuak.
Nigeria-a inelna neihah C Rahul Yadav chuan Karan Rajan Rajarajan lakah 21-15, 21-13 a hnehna changin mens singles champion a ni. Nikuma Mauritius Open champion ni thei Rahul hian semifinal-ah world number 55 Misha Zilberman chu a hneh bawk.
Pullela Gopichand-a kaihhruaina hnuaia inzir kum 19 mi Rahul hian season hmasa khan Russian Open Grand Prix-ah bronze medal a lo dawng ve tawh bawk.
Mipa doubles final-ah Manu Attri leh B Sumeeth Reddy te ṭangdun chuan khawtual tlangval Godwin Olofua leh Anouluwapo Juwon Opeyori te inkawp lakah 21-13, 21-15 in hnehna an chang ve bawk. Manu leh Sumeeth te hi nikum khan Rio Olympic-ah India aiawhin an khel tawh bawk a ni.