Ni 308 hnuah India-in Pakistan lakah phuba an la
India leh Pakistan a nih tawh chuan eng infiamna pawh ni se boruak a sang nghal a, cricket a nih tawh phei chuan boruak sanzia hi thua sawifiah a har. Pathianni zana India leh Pakistan inkhel pawh an sawi 'hot' lawk ang chiahin inkhel pawh boruak a ṭang a, Men in Blue hian wicket ngain hnehna an chang.
Nikum khan T20 World Cup-ah Pakistan hian India hi wicket 10-in an sawp a, India rama cricket ngainatute thinlung an hliam. Ni 308 hnuah Hardik Pandya hmangin Men in Blue-in cricket hmangaihtute thinlung hliam an tuam dam.
Ṭhumvawr rah
Dubai International Stadium-ah India chu ṭhumvawrah an vannei a, captain Rohit Sharma-a'n pitch awm dan hre chungin ball vawm hmasak an thlang. Pitch-ah ball a sawt ṭha a, Indian pacer-ten an hmang ṭangkai hle.
Bhuvneshwar Kumar-a'n wicket li a la a, Pakistan captain Babar Azam chu 10 runs chauh a siam tihin pavilion-ah a kir tir. Hardik Pandya pawhin wicket thum a la bawk a, Indian pacer-te an che ṭha.
India bowler-te an che ṭha chungin Mohammad Rizwan-a'n 43 runs a siam bakah tailender Shahnawaz Dahani-a'n ball ruk leka 16 runs ngawt a siam chu Shaheens tan beiseina siamtu a ni. Pakistan hi over 19.5-ah thi vek mah se 147 runs an siam avangin beiseina tlem an nei a, 10-15 runs chu siam belh thei se India tan buaina tham a tling ang.
Cricket hmuhnawm chu
India batter ṭha KL Rahul chu ball a hmachhawn hmasa berah Naseem Shah-a'n a vawm hlum nghal. Kum 19 mi Naseem hi ram tan T20-a a match hmasa ber a ni a, a ball vawm ṭha zet chu India batter-te chhaih buaitu a ni.
KL Rahul aiah Virat Kohli a rawn lut a, India captain hlui hi T20-a ram tan match 100 a khelhna a ni. Kohli hi T20, ODI leh Test-a India tana match 100 khel vek thei hmasa ber a ni a, khawvel pum huap angin pahnihna a ni pha bawk.
Kohli hian 35 runs siam pha mah se captain Rohit Sharma-a'n 12 runs chauh a siam a, over 9.1-ah India hian 53 runs chauh an la siam bakah wicket thum an hloh tawh avangin Pakistan nen dinhmun ṭha zawk sawi thiam a har tawh.
India tan Hardik
Ravindra Jadeja (35) leh Suryakumar Yadav (18) ten India chu dinhmun ṭhaah an dah a, Men in Blue hnehna chanpui tak erawh Hardik Pandya a ni. Gujarat tlangval Hardik hian India chakpui turin vanneihna a mamawh tel.
Over 17.5-naah Naseem Shah-a'n Hardik hi a vawm hlumah a ngai a, umpire pawhin Naseem hi a ṭawmpui. Amaherawhchu thil thlen dan ennawn a nih hnuah Hardik a him hlauh a, hetihlai hian 14 runs chauh a la siam.
Hardik leh Jadeja te an inthlawp ṭhat zui avangin India awlsam takin an chak turah a ngaih theih a, over tawp berah 7 runs chauh siam a ngai tawh. Mahse, Mohammad Nawaz rawn pen chhuakin ball hmasa berah Jadeja a vawm hlum a, boruak a dang daih.
Ball thum chauh a la awm tihin India hian chak turin run ruk siam an la mamawh a, Pakistan aiin an dinhmun a ṭha tawh bik lo. Pressure sangah Hardik-a'n six runs a vaw chhuak a, ball hnih dah bangin India-in hnehna an chang hram.
India hian August 31, Nilaini zanah Hong Kong an hmachhawn ang a, Pakistan pawhin September 2, Zirtawpni zanah Hong Kong an hmachhawn ve dawn. Team pahnih hi an chak ve ve a rinawm a, an chak ve ve a nih chuan September thlaah India leh Pakistan inkhel kan thlir leh thei ang.
Zaninah Bangladesh leh Afghanistan
Asia Cup 2022-ah zanin dar 7:30 hian Bangladesh leh Afghanistan te Sharjah Cricket Stadium-ah an inkhel dawn. Afghanistan hian an match hmasa bera Sri Lanka an hneh avangin Super Four lut turin Bangladesh hneh hi a tawk dawn a, chutihrualin vawi khat inlanna tur Tigers hi hneh an awlsam lo ang.
Kumin March thla khan Bangladesh leh Afghanistan te hian T20 match hnih an khel a, vawi khat ve ve an chak. An intumna hnuhnung ber thlir hian team pahnih hi an intum tawk dawn tih a chiang. Afghanistan tan opener Rahmanullah Gurbaz a pawimawh dawn a, Sri Lanka an hneh ṭuma man of the match-a thlan bowler Fazalhaq Farooqi pawh a pawimawh leh ang. Bangladesh lamah captain Shakib Al Hasan hi khawvel ang pawha player ṭha ni phak a ni bawk.
Asia Cup-ah hian team ruk an inel a, group hnihah pathum ve ve dah hran a ni. Group khat aṭangin team hnihin Super 4 an lut ang a, team palite hi vawi khat ṭheuh an inkhelh kual hnuah a sang pahnihin final an khel ang.