Nadal inlan hun a thleng dawn

Rafael Nadal-a'n Grand Slam nomawi nei hnem ber a nihna sawhngheh zual a tum a, nizan aṭanga khelh ṭan US Open-ah a inlan dawn. Nilaini zing dar 4:30 hian Australian tlangval Rinky Hijikata nen an inhmachhawn ang.

Major title vawi 21 la tawh Novak Djokovic a inlan thei dawn lo, a elpui ber a inlan dawn loh avangin Nadal tan chuan kal fal theihna remchang a ni dawn - chutih rualin awlsam taka champion ngawt theih chu a ni dawn bik lo.

Wimbledon khelh zawh takah khan Nadal hi a dul hliam vangin a khel zo thei lo. Spanish star chuan, "Tournament ka khel hnem tawk lo a, ka inlan chhunah chuan theihtawp ka chhuah zel ang.

"Ka hmanraw neih leh remchang ang zelin training ka nei ngawrh a, eng ang taka ṭha nge ka nih chu fiah a ni leh dawn. Inbuatsaihna lamah chuan hliamin min tibuai rih lo, tournament takah pawh harsatna a thlen loh hram ka beisei," tiin a sawi.

Nizan aṭang khan Flashing Meadows, New York-ah US Open hi khelh ṭan a ni a, world number 1 leh seeded pakhatna ni bawk Daniil Medvedev chuan inelna neih ṭan zan hian a match hmasa ber a khel nghal a, result erawh kan hre hman lo.