Mizo player pali an ko

India rama hockey thuneitu sang Hockey India chuan senior team camp zawm turin player 60 a ko a, an zingah hian Mizo player pali - Lalremsiami Hmar, Lalrindiki Ralte, Marina Lalramnghaki leh F. Ramenmawii te an tel.

Hockey Mizoram honorary secretary Lalrinfela chuan, "National Centre of Excellence - Sports Authority of India, Bhopal-a awm turin a tirah mi 19 thlan an ni a, an zingah Mizo pathum an tel. Camp zawm tur hian Inrinni khan an zuk thleng tawh.

"Bhopal aṭang hian Bangalore lamah India senior team camp zawm tur thlan an ni leh a, nimin khan camp neihna tur hmun hi an pan leh nghal," tiin Vanglaini a hrilh. Didiki, Marina leh F-i te hian Bhopal aṭangin Bangalore an pan - Remsiami erawhin Mizoram aṭangin India camp a pan thung ang.

Mizo player palite hi Thenzawl Hockey Training Center aṭanga inzir chhuak an ni a, an vai hian India junior team tan chuan an inlan tawh. Senior team tan erawh Remsiami chauh a la inlan thung a ni.

Hockey Mizoram chuan Mizo player pali koh an ni chu lawmawm an ti a, hlawhtlinna sang zawk chang zel turin duhsakna an hlan tih an tarlang.