Antony-a'n Old Trafford a pan ta ; Manchester United-in £200mtd chuang an seng tawh

Manchester United chuan Antony chungchangah Ajax nen inremna an nei tawh a, he thu i chhiar meuh chuan Brazil winger hi Man United player a ni tawh hial ang.

Kum 22 mi Antony manah hian Man United-in Ajax hnenah pound maktaduai 80.75 an pe phawt ang a, a chet ṭhat dan a zirin pound maktaduai 4.25 an pek belh leh ang. Brazilian winger hi kum nga daih contract ziak tura ngaih a ni.

Antony hi an la fel a nih chuan a man hi khawvel defender man to ber Harry Maguire man nen an inzat dawn a, Man United player man to pahnihna a ni dawn. Pound maktaduai 89 man Paul Pogba chu United player man to ber a la ni reng.

Mamawh chhanna?
Erik ten Hag-a'n nipui bazar inhawn ṭantirh aṭangin Antony hi lak a tum tawh a, Ajax-in sum an phut hnem avangin an la thei lawk lo. Tuna pound maktaduai 85 (€100mtd) zet senga an lalut tur hian United-in an manager Ten Hag-a duh dan an ngaih pawimawhsak tih a tilang.

Antony hi ke vei lama pet a ni a, dinglam aṭanga lakluh nuam ti chi a ni. Brazilian a nih ang ngeiin Antony hian ball a thiam a, a tlan chak bawk. A khelh dan hmang hi Jadon Sancho nen an inang a, Ten Hag-a'n player pahnih chhawr dan a dap dawn nge, khelhna hmun a inchuhtir dawn tih chu hunin a hril ang.

Engpawh chu ni se Ten Hag hian squad tihchhah leh tihchak a ngai pawimawh tih a lang a, Antony hmang hian Man United goal bawh a na sawt tura ngaih a ni.

Chutihrualin Man United mamawh tak erawh striker niin a lang a, Cristiano Ronaldo hmalam hun awm dan tur hian kawng thui tak a hril ang. Ronaldo hian tun dinhmunah Anthony Martial inhliam chung pawhin bul a ṭan pha lo a, Portuguese striker hian Old Trafford hi a chhuahsan erawh chuan player thar lak belh an mamawh dawn. Man United hi Napoli striker Victor Osimhen nen pawh sawizawm a ni a, mahse Osimhen hian tun dinhmunah chuan Champions League khelh a duh.

£200 chuang
Man United hian Antony hma hian defender Lisandro Martinez, midfielder Casemiro, full-back Tyrell Malacia leh playmaker Christian Eriksen te an lalut tawh. Danish midfielder Eriksen hi a thlawna an lalut chungin player lei nan pound maktaduai 226.7 an seng tawh.

Erik Ten Hag-a hoten an la duh tawk lo a, goalkeeper David de Gea thachhang dawltu tur an zawng leh mek. Newcastle keeper Martin Dubravka chu loan hmangin an lalut hnai a, mimal contract chungchangah chuan inremna an nei tawh. Dubravka hian club thuneitute hnenah chhuah a dil tawh a, he thu i chhiar meuh chuan club pahnih hi an inrem thei tawh hial ang.

Manchester United hian September 1, Ningani zanah Leicester City an hmachhawn dawn a, September 3, Inrinni zanah Arsenal an mikhual lehnghal dawn. Antony hian medical bakah work permit a ti fel hman a nih chuan Foxes a hmachhawn thei ang a, chutihrualin Brazilian winger hi Gunners an mikhual hunah club tana a match hmasa ber a khelh a rinawm zawk.