Dan rual loh a tlan chak Verstappen

A bul ṭanna hnung deuh mah se, a hma a driver dangte chu hneh takin a tlen pel zel - Formula 1 champion lai Max Verstappen hi tuman an umphak thei lo. A kum zawnin car intlansiakna sang berah a champion leh ngei dawn niin a lang ta.

Pathianni zana tlan zawh tak Belgian Grand Prix-ah Verstappen hian 14-na aṭangin bul a ṭan a, lap 44 an tlan zawh meuh chuan a hmasa berah a thleng. A hnungah hian amah ang bawka Red Bull car khalhtu Sergio Perez a thleng ve bawk.

A hmasa ber aṭanga tlan ṭan, Ferrari driver Carlos Sainz chu pathumna niin, season tir lama champion beisei vetu Charles Leclerc chu parukna a ni. World champion vawi sarih ni tawh Lewis Hamilton chu a tlan tluan ve thei lo.

Nomawi a hnai
F1 season kal laiah intlansiak vawi 14 an hmachhawn tawh a, chung zinga vawi kuaah chuan Verstappen a chak thei. Point 284 a hmu tawh a, amah hnaih bertu Perez aiin point 93 teh meuhin a sang fal tawh, umphak a harsa tawh khawp ang.

Europe khawmualpuiah Dutch GP leh Italian GP an la tlan dawn, chumi hnuah chuan Asia leh America khawmualpui bakah Abu Dhabi GP an tlan leh dawn. Intlansiak hnuhnung lamah chuan champion a hriat hman tawhin a rinawm.

Belgian GP an tlan zawh hnuah Mercedes team principal Toto Wolff chuan, "Europe kan chhuahsan meuh chuan engkim a chiang tawh mai thei," tiin an elpui Red Bull leh Verstappen ten F1 an thunun hnehzia a sawi.

Red Bull team principal Christian Horner chuan, "Max hian season hmasa khan nomawi a chawi a, hlawhtlinna a chan aṭang khan nasa takin hma a sawn belh leh tawh. A car khalh dan leh a rilru put hmang hi midang chunga mi a ni," a ti.

Chetsualna
Lewis Hamilton-a'n a duh leh beisei angin season a hmang lo chhunzawm. Spa-Francorchamps tlan kawngah pawh a chesual, lap hmasa ber an tlan laiin Fernando Alonso nen an in tai a, intlansiak tlan zui thei loin a hun a tawp nghal.

Chetsualna thleng chungchangah Alonso chuan Hamilton hi "Mimawl" tiin a sawi a, intlansiak zawh hnuah erawh Lewis a insawifiah thung. British tlangval chuan, "Ka hnung lamah, ka hmuh theih loh lamah ani kha a rawn tlan.

"Min tlan pel turin hmun ka la pe zau tawk lo a, chuti chung chuan a rawn in rawlh, kha thil kha ka tihsual a ni thei dawn em ni," tiin ama tihsual niah a ngai lem lo a, point a hmuh loh phah erawh pawi a tih thu a sawi thung.

Hamilton hian championship table-ah point 146 chauh a la hmu a, a tan nomawi beiseina la thamral chiah lo mah se champion tur chuan thil mak a thlen a ngai ang. Michael Schumacher-a nen record inṭawm an neih, vawi sarih champion chu a kal san mai bik dawn lo.