A vawi hnih nan Axelsen a champion

Viktor Axelsen chu a vawi hnih nan BWF World Championship title a la, final inkhel hmuhnawmah Denmark tlangval hian Kunlavut Vitidsarn chu 21-5, 21-16 in a hneh.

World number 1 Axelsen hian season a hmang ṭha, kumina singles match a khelh tawh hoah chuan vawi khat chiah chak loh a nei. Tokyo khawpuia nomawi inchuhna inkhelah pawh hian kum 21 mi Vitidsarn tan a la u hret.

Kum 28 mi Axelsen chuan, "A ṭha thei ang ber nih ka duh, ka thlen chin aṭang hian nitin hmasawn zel ka la tum. Nitin mai hian chawl loin ka la inzir belh zel a, ka inkhelh chhung chuan tawp chin a awm lo ang," tiin a sawi.

Denmark tlangval hian nikum khan Tokyo Olympic-ah gold medal a dawng a, 2024 Paris Olympic-ah champion leh a tum ang. Badminton legend Lin Dan chuan tun hmain a zawnin Olympic gold medal a lo dawng tawh.

Hmeichhe inelna lamah Akane Yamaguchi chuan a nomawi a humhim. Japanese nula hian amah ṭan em emtu fans hmaah Chinese player Chen Yufei chu 21-12, 10-21, 21-14 in a hneh.

Kum 25 mi Yamaguchi hian game hloh miah loin final hi a lut thei, gold medal inchuhna inkhelah game khat hloh ve mah se a che buai zui lo. March thla khan All England Championship-ah a champion tawh bawk a, atan season duhawm a ni.