Saints khelmualah chak beisei Chelsea

Leicester City laka chak hlim Chelsea chuan zanin dar 12:15-ah league match an khel lehnghal dawn a, khualmualah Southampton an hmachhawn ang.

Club neitu thar hnuaiah London club-in beisei angin season bul an ṭan lo a, Premier League-a an match hmasa berah Everton (1-) hneh mah se Tottenham Hotspur (2-2) leh Leeds United (3-0) lakah an chak zo lo zui.

Kartawp inkhelah vannei takin Leicester City (2-1) an hneh a, zaninah Saints an lenchilh zui dawn - Thomas Tuchel-a team tan zanin hi insiamrem hun a ni a, match li khelh tawha vawi khat chiah la chak Saints an hneh zo lo a nih chuan mualphona tawpkhawk a ni ang.

An la buai!
Chelsea buaina langsar tak chu neitu thar hnuaia insiamrem tura hun an duh rei hret hi a ni - nipui transfer-ah tlarhnunga player rinawm Antonio Rudiger leh Andreas Christensen an chân a, striker Romelu Lukaku leh Timo Werner an chhuahtir bawk.

Blues hian tlarhnung thawmphui nan Kalidou Koulibaly lalut mah se insiamrem turin hun a la mamawh a, pound maktaduai 60 chuang man Marc Cucurella hian a man phu tawkin a la khel rih lo.

Tlarhmaah Raheem Sterling-a'n goal khung a la thiam reng tih kan hmu a, chutihrual chuan Blues hian striker pangngai an la lakluh loh avangin an goal nawr kawngah harsatna an la tawk niin a lang.

Buaina, lo kiang la...
Chelsea buaina langsar tak chu transfer bazar-ah an duh ang lalut tura hun an duh rei hi a ni a, hei hian team pumpui rilru thlengin a nghawng thei. Blues hian Barcelona striker Pierre-Emerick Aubameyang chu £15mtd-a lalut turin dawr zet mah se an inngaihtuah ṭha mek.

Arsenal striker hi kum 33 a nih tawh avangin heti zat sum sen hi an ui thar a, a hlawh a tam dawn bawk avangin an ngaihtuahna a buai - hetihrual hian Everton forward Anthony Gordon chu £60mtd hiala lakluh huamin dawr mah se hnar an la ni zel rih!

London club hian Wilfried Zaha lam an hawi tawha sawi a ni hial - hetihlai hian Leicester City-in vawi tam an hnar hnuah centre back Wesley Fofana chu King Power Stadium aṭangin an lalut ngei dawn niin a lang a, £70mtd bawr man tur defender hi USA-a medical nei turin an tir niin khawthlang media-te chuan an tarlang.

Chak a ngai
Chelsea tan Leicester City laka hrem vanga khelmuala a naute ho thei lotu Thomas Tuchel chuan a team a ho leh thei tawh dawn a, German coach hnuaiah chuan an game pawhin hma a sawn hret tura beisei a ni.

Hetihlai hian Foxes laka red card hmutu Conor Gallagher chu zaninah a inlan thei dawn lo a, Napoli aṭanga lakluh Kalidou Koulibaly erawh hrem tuar zo tawhin Thiago Silva nen an inkawp leh thei tawh ang.

Cucurella aiah Ben Chilwell-a'n bul a rawn ṭan a nih pawhin thil mak a ni lo ang - Chelsea tana hriattur erawh Southampton hi chetsual theihna an ni a, tun season inelna hrang hranga goal li khung tawh Ché Adams neitu an ni.