Neymar-a'n goal a khung chhunzawm zel

Paris St Germain forward Nermay-a'n season ṭan hmain atan kum ṭha a nih a beisei thu a sawi a, a sawi ang ngeiin season duhawm a hmang mek - tun season Ligue 1 match li a khelh aṭangin goal ruk a khung bakah assist vawi ruk a nei bawk.

Pathianni zan Ligue 1 inkhelah PSG erawh an chak zo lo, an mikhual AS Monaco lamin Kevin Volland hmangin minute 20-naah hma an hruai a, hun rei tak chhung chu an hum thei. Mahse, minute 70-naah Neymar chuan ama penalty hlawh chhuah a khung; 1-1 in an inhnehtawk ta a ni.

PSG coach Christophe Galtier chuan, "Monaco khan a tir lam an khel ṭha hle a, point thum hmuh chu duh viau mah ila vui thei chu kan ni lo. Team ṭhenkhat chu mahni an inveng thiam hle, kan lamah a goal bawk avangin inenfiah kan ngai dawn.

"Goal khung theihna remchang kha kan insiam nual a, kan khung hleithei miah lo mai kha chu a mak angreng hle, match lehpekah chuan a danglam tawh ang," tiin a sawi. Match hmasa pathuma goal 17 khung thei an ni tih erawh hriat a ṭha ang.

Inkhel dangah Marseille chuan Nice 3-0 in an sawp. Marseille tan hian Arsenal leh Manchester United forward hlui Alexis Sanchez chuan goal hnih a khung nghal, a vanglai pel deuh tawh mah se player hlauhawm tak a la ni.