Premier League striker ropui Harry Kane
Nottingham Forest-in an mikhual Tottenham Hotspur lakah chak tum ngam mah se, striker pakhat ngam loh an nei a, a hming chu Harry Kane a ni.
English striker hian penalty chhuih lut lo mah se, goal hnih a khung tho a, Nottingham Forest lakah Spurs chu 2-0 in hnehna a chanpui - Antonio Conte naute hian match li an khelahah point 10 an nei tawh.
Tottenham Hotspur hian Nilaini zanah league match an khel zui dawn a, khualmualah West Ham an lenchilh ang - Conte hoin Spurs-in nomawi an beisei ngam a, an hmuhnawm tawlh tawlh dawn.
A hming Kane
City Ground-ah Spurs-in goal khung turin hun an mamawh rei lo - Kane chuan minute ngana lekah Dejan Kulusevski-a siamsak aṭangin goal hmahruai a khung a, English football league-a goal 200 a khungna a ni.
Minute 56-naah Kane hian penalty a chhuih lut lo zui a, Manchester United-a hmun chang phak lo Dean Henderson chuan keeper ṭha bik a ni tih pholan nan a dansak.
Mahse, Kane hi dan reng theih a ni lo - minute 81-naah hnai tak aṭangin a tauh lut leh a, Premier League-a goal khung hnem lamah Andy Cole (187 goals) nih rualin, Wayne Rooney (208) leh Alan Shearer (260) chiah a tluk lo.
Spurs an ṭha
Tottenham fan-ten an la champion ngai lohna Premier League-ah nomawi an mitthla ngam a nih pawhin an demawm lo - an khel a hmuhnawm a, mit an titlai takzet.
South Korean striker Son Heung-min a la vannei hleithei lo a, a vanneih zan ni se goal khung theihna chance vawi hnih ngawt a nei. Kulusevski a tlangnel tawlh tawlh a, Swedish forward hi Premier League defender-te ven châk loh pawl a ni der tawh.
Kane bawk lam nawn a ṭul - English striker hian penalty chhuih lut lo mah se hattrick siam theihna chance dang pawh a nei a, a che vel chu hmuhnawm a tling.
Forest beiseina
Nipui transfer-ah Forest-in player 18 ngawt an lalut a, Premier League kai thar hian English top flight-ah season khat chauh hun hman an tum lo - Spurs lakah point hlawhchhuah ngei tumin an khel ngam.
Forest tan nipuia lakluh Morgan Gibbs-White leh forward Brennan Johnson che vel chu Spurs tlarhnung tan hnawksak an tling a, Liverpool aṭanga lakluh Neco Williams-a'n 1-1 nih tir theihna remchang a neih a chhawr lohte kha a ui vawng vawng ang.
A tawpah chuan Henderson hming lam rik ngei a ngai - hmanni lawka Declan Rice penalty dangtu hian Kane a penalty a dang leh ta a, kum 2018 hnua Kane-a penalty pet dang leh thei hmasa ber a ni. United-a hmun chang phak lo keeper hi England number 1 a ni lo ang tih sawi theih a ni ta lo.