Fiorentina lakah Napoli an chak zo lo

Serie A team 20 zingah chak vek thei an awm ta lo. Pathianni zan inkhelah Napoli chu an mikhualna ramah Fiorentina nen 0-0 in an inhnehtawk a, point sarih hmuin table chung berah chuan an awm ta tho.

Champion lai AC Milan, Napoli, Laizo, Atalanta, Torino leh AS Roma tan match li aṭangin point sarih ṭheuh an hmu; an hnuaiah Inter Milan leh Juventus an la awm bawk, Italian champion nih tumin inum boruak a nung dawn hle.

Napoli coach Luciano Spalletti chuan, "Fiorentina khan kan player-te kha a mal malin an veng thiam hle a, a bik takin ball kangah an inveng thiam. Mahni inveng thiam tak lakah chuan goal khung a harsa ṭhin," tiin a sawi.

Italian club hian an striker Victor Osimhen chu Manchester United laka chân mai thei dinhmunah an ding mek. Spalletti chuan, "Man United lamin player pakhat lei nan euro maktaduai 100 an hmang phal a nih chuan kan tan ṭan reng a harsa ang," tiin a sawi bawk.

Nipui bazar chhungin Napoli hian an player pawimawh - Lorenzo Insigne, Dries Mertens, Kalidou Koulibaly, David Ospina leh Andrea Petagna te an chân tawh a, striker ṭha Osimhen a chhuak leh a nih chuan team nghet tak din leh a harsa ang.