Lewy & Benzema ten goal an khung ve ve

European football-a striker 'hot' pahnih Robert Lewandowski leh Karim Benzema ten Pathianni zan khan goal hnih ve ve an khung a, an team Barcelona leh Real Madrid chu hnehna an chanpui ve ve.

Barcelona hian an mikhual Real Valladolid chu 4-0 ngawtin an lo sawp a, striker chhuanvawr Lewandowski-a'n goal hnih a khung bakah Pedri leh Sergi Roberto ten goal khat ve ve an khung bawk.

Hetihlai hian Real Madrid chuan khualmualah 3-1 in Espanyol an hneh ve bawk a, Spanish champion tan Benzema-a'n goal hnih khungin Vinicius Jr chuan goal khat a khung a, Espanyol tana Joselu goal khungin awmzia a nei phak lo.

Tun season La Liga-a inel ber tura ngaih team pahnihin hnehna an chan laiin, match hnih a zawna an chak hnuah Villarreal an chak zo lo a, Unai Emery enkawl team hian Getafe chu 0-0 in an inhnehtawkpui.

A hming Lewy
Inkhel ṭan aṭanga minute 24-na lekah Lewandowski chuan goal hmahruai a khung a, mual ding lam aṭanga Leeds United forward hlui Raphinha-a ball siamsak chu ṭha zetin a tlawh lut.

A la tawk mai lo - minute 43-naah Pedri hun a inher chhuak a, Barca midfielder ṭhangduang hian Ousmane Dembélé siamsak chu 'cool' zetin goal-ah a chantir a, chawlhlawk hman hmain 2-0 a ni.

Valladolid-in Barca nawr let an tum a, bench aṭanga captain Roque Mesa luh hnuah an nawr na lehzual - mahse, Valladolid phur chhungin rei a daih lo - minute 64-naah Lewy bawk a inlar.

Polish striker hian Dembélé-a ball siamsak ṭha zet chu amah vengtu Valladolid defender Joaquín Fernández rin loh lamah backheel hmangin a khung a, hun pek belh minute hnihnaah Sergi Roberto chuan chak nemnghehna goal a khung zui.

Barca chu le
Catalan club-in sum nei lo chungin transfer bazar-ah risk an la a, tuna an lan dan chuan an la tifuh rih - tun season-a an match hmasa berah Rayo Vallecano chu 0-0 in inhnehtawkpui mah se Real Sociedad (4-1) leh Valladolid (4-0) lakah a zawnin an chak ta.

Barca boss Xavi lawmna tizual turin Lewandowski-a'n an match hnuhnung pahnihah goal a khung ve ve a, league match thum a khelhah goal li a khung der tawh - Polish striker a vul zel.

Catalan club tan nipui transfer-a chhuak tur anga sawi awm hman Dembélé chuan assist vawi hnih a nei a, Sociedad lakah goal a khung tawh bawk avangin French forward hi European football-a player hmuhnawm ber pawl a ni leh der tawh.

Barcelona-in Sevilla aṭanga an lakluh Jules Kounde chu player dang hralhchhuah la nei lo mah se an ziak lut thei ta bawk a, hei hi loan-a Samuel Umtiti an chhuahtir vang niin a lang - Kounde hian bul a ṭan nghal a ni.

Hei le Real
Barcelona inthuam ṭha viau mah se Real Madrid-in an elpui club hnenah an la awm ve reng tih an hriat nawntir a, an mikhualna Espanyol khelmualah inthlahrun tum loin goal thum ngawt an khung.

Real tan Vinicius chuan minute 12-na lekah goal hmahruai a khung a, a goal khung hi Liverpool aia Real thlangtu Aurelien Tchouameni ball pek fing tak aṭanga a khung a ni.

Mahse, mualneitu Espanyol an beidawng duh lo - Real tan pawha lo khel tawh striker Joselu chuan si phurh a rawn sut a, a shot hmasa chu Thibaut Courtois-a'n dang mah se a per lehlam chu goal-ah a chantir.

Kum 32 mi Joselu-a'n goal dang khungna remchang nei mah se a chhawr thei lo - hun rei tak chhung chu team pahnih hi an inhnehtawk mai dawn niin a lang hman a, Real ṭantute an hlauthawng.

A hunah Benzema
Mahse, Real-in chhandamtu an nei a, a hming chu Benzema a ni. Hun tawp nan minute hnih chiah a awm tawh tihah Rodrygo chuan ṭha zetin ball a thlawh lut a, a awmna tur taka lo awm Benzema chuan goal-ah a lo chantir.

Espanyol an chesual zui - hun pek belh minute ruknaah goalkeeper Benjamin Lecomte chu Dani Ceballos laka professional foul avangin hnawhchhuah a ni a, captain Leandro Cabrera-a'n si ban a nghah a ngai zui.

Catalan club hian bench-ah keeper la nei mah se, vawi thum ngawt substitution an siam tawh avangin substitution an siam thei tawh lo a, defender Cabrera hian si ban a nghah a ṭul phah.

Benzema chuan Lecomte foul vanga an freekick hlawhchhuah chu a pet a, direct free kick hmanga a goal hmasa ber a khung - Real tana goal 327-a khungna chiah a ni nghal bawk.