En châkawm India U19 vs Ramhlun North

Great Sports I Day Football-ah AIFF Under 19-in an thiam tih an pholang nghal a, amah­erawhchu Floyd Pinto hote hian Ramhlun North FC an hneh loh chuan an tum ram an thlen a rinawm loh. Team pahnih tan an match hnihna tur ve ve a ni a, group stage ni mah se quarterfinal ang maia ngaih theih a ni.

Vawiin chhun dar 12:15 hian India rama rawlthar ṭha rual leh Lalruatliana Sailo (Tawia) enkawl MPL club te Lammualah an inkhel dawn a, inkhel en man hi Rs 30 a ni.

India Under 19 hian Aizawl FC lakah point hnih an hloh tawh a, Ramhlun North FC erawhin Dinthar FC 4-1 a hnehin point thum an hmu tawh thung.

Hmabak hautak
Group khatah team nga an awm a, round khat khelh apiangin team pakhat an awl. AIFF Under 19 hi inelna ṭan niah an awl nghal a, an match inkara ni khat an awl bak hahdam hun an nei tawh lo.

Floyd-a hote hian team khauh ber tura ngaih Aizawl FC aṭangin bul an ṭan a, point an hmu thei. Amaherawhchu I League club nen match hautak an khelh lai hian Ramhlun North an hahdam a, Tawia hote hian AIFF Under 19 hmachhawn tur hian Pathianni chhiar tel lohin ni thum inpuahchahna hun ṭha an nei thung.

India Under 19 hian Ram­hlun North zawhah hian August 4, Zirtawpniah Bethlehem Vengthlang an hmachhawn dawn a, BVT hian vawiinah match an nei lo leh bawk. Coach Floyd-a'n semifinal thlen chu an tum a nih thu a sawi a, an fixture aṭanga teh chuan an hmabak hi a hautak hle.

An thiam, an rang
AIFF Under 19 player-te nikum aiin an inhrechiang tawh tih a lang a, an game plan pawh an bel tawh zawk.

Coach Floyd chuan, "Kan formation hman hi a pawimawh ber a ni lo a, 4-4-2 a ni emaw 3-5-2 emaw eng formation pawh hmang ila, player-ten an tihtur an hriatchian chu a pawimawh ber a ni," tiin Vanglaini a hrilh.

Aizawl FC nena an inhma­chhawn ṭumin India Under 19 player-ten an hna an hre chiang a, wing back-a an dah Ashish Rai leh Naorem Roshan Singh-te chu a ṭul hunah chuan forward ang maiin an tlan chhuak thei a, defensive midfielder Namgyl Bhutia-a'n central defender hna a chelh tel thei bawk.

India Under 19 hian midfield-ah Zonunmawia leh Laleng­zama Vangchhia te an chhawr a, Champhai rawlthar Zonun­mawia hian an rawn zin hmasak ṭum kha chuan right back hna a chelh. Floyd chuan, "Inkhelh thiam bik hi an awm a, heng player hi chu an lian lo a nih pawhin an khelh theihna hmun hi kan zawnsak tur a ni, position pakhat aia tam khel thei player hi chu coach tan hian an hlu a ni," tiin Mizo rawlthar a fak.

Kum tluana awmze neia training an nih avangin AIFF Under 19 player-te an thiam bakah an fitness a ṭha a, an che rang tel bawk. Aizawl FC nena an inkhelh ṭumin defence laia ding Lalliansanga leh Sahil Pawar te an khawng ṭha a, Nigerian forward Oneyeama Francis leh Olaniran Joseph Segun te lakah fiahin an awm ang. Match hmasa bera inhliam vanga lakchhuah captain Edmund Lalrindika chu coach Floyd-a'n a nat loh thu a sawi a, vawiinah a inlan theih beisei a ni.

Hun ṭha
Dinthar FC hneh vanga phur chho mek Ramhlun North tan lawmna tur a awm a, ONGC captain hlui V. Lalchhuanawma'n transfer-a document ṭul ang a tihfel tawh avangin match hmasa bera inlan loh hnuah chhawr theihin a awm ang.

Ramhlun North hian hnehna an chang a nih chuan match hnihah point ruk an hmu dawn a, semifinal lut turin an dinhmun a ṭha sawt ang.

RNFC coach Tawia chuan, "AIFF Under 19 player-te lak hran theih tawh an ni a, naupang chhia an ni tawh lo. An tih tur an hria a, khelh dan phung nghet an nei a, khelhpui an harsa dawn. Hei vang hian kan ṭhat dan berin player ka rem dawn a, chak tumin kan khel ang," tiin fimkhur takin a ṭawng.