United-ah Matic lut ta
Manchester United chuan pound maktaduai 40-in Chelsea midfielder Nemanja Matic chu kum thum chhung atan an lalut a, pound maktaduai 40 zinga maktaduai nga chu a khelh ṭhat dan a zira pek tur niin a contract hi kum khat dang pawh sei leh theih tura tih a ni bawk.
Jose Mourinho-a'n tun nipui transfer chhungin defender Victor Lindelof leh striker Romelu Lukaku te a lei tawh bawk avangin Matic hi a player thar pathumna a ni. Serbia international hian Chelsea lama amah enkawl tawhtu Mourinho hnuaiah a khel leh dawn tihna a ni.
United manager Mourinho chuan, "Nemanja hi Manchester United player a ni a, Jose Mourinho player a ni bawk. Kan hnena rawn kal tura thutlukna a siam hi ka lawm a, player dangte pawhin an lo lawm ngei ka beisei," tiin United jersey number 31 ha tur Matic chungchang a sawi.
Kum 28 mi Matic chuan Blues tan hun nuam leh hlimawn a hman tawh ang bawkin United nen hun ṭha a hman theih a beisei thu a sawi a, a club thar chu sulhnu ropui tak nei an nih thu a sawi tel bawk.
Feet 6 leh inches 4 zeta sang Matic hian kum 2014 khan a vawi hnih nan Chelsea a zawm a, a laluttu chu Mourinho tho hi a ni. Stamford Bridge-ah tun hnai season li chhung khan inelna hrang hrangah match 151 khelin goal sarih a khung.
Manchester United hian United States lamah pre season tour ṭha takin an hmang tawh a, season thar inbuatsaih nan an la duh tawk lo. Zanin dar 12:15 hian Aviva Stadium, Ireland-ah Italian club Sampdoria an hmachhawn ang.