MFA-in Referee ṭha zawk neih tumin ṭan a la
Mizoram Football Association chuan Great Sports Independence Day Football 2017 khelh mekah referee-te intuaitharna atan leh an hmasawn zelna atana pui turin AIFF aṭangin Referee Assessor Supriya Bhattacharjee, West Bengal an chah chhuak. Inkhelh ban apiangin football referee-te an chet dan thlirlet puiin a zirtir ṭhin.
AIFF Referee Assessor hian Mizoram referee-te chu an chhuanawm a tih thu a sawi a, chutihlaiin fitness leh kawng ṭhenkhatah hmasawnna tur an neih thu leh, hmasawn zel turin theihna an neih thu a sawi.
MFA chuan August 14-19, 2017 chhung hian Aizawlah AIFF Referee Development Course an buatsaih leh dawn a, hetah hian Independence Day Football 2017-a referee te chet dan an ennawn ang a, inzirna tur an neihte a takin an zir leh dawn a ni.
August 14-19 chhunga Referee Development Course-ah hian referee ni sate tel vek turin a hriattir a; hei bakah hian referee ni thar duh mipa leh hmeichhia pawl 10 pass chin tu pawh tel theih a ni a, hnathawh nei tawhte leh zirlai tan pawh football referee nih hi a theih a, MFA chuan he Development Course ah hian a tam thei ang ber tel turin a sawm.
Issued by Information and Publicity Committee, Mizoram Football Association