Chanmari-in Rhino an hneh hram

Great Sports I Day Football-ah Chanmari FC-in Mizoram pawn aṭanga chahluh Rhino Charge chu Vanlalbiaa Chhangte goal hmangin 1-0 in an hneh.

Mizoram Premier League champion Chanmari hian H. Vanlalthlanga kaih­hruaina hnuaiah a zawnin match hnih an chak ta a, an hmachhawn leh tur chu MFA Super Cup champion leh a zawna vawi riat chak tawh Chhinga Veng an ni.

Chhingcows coach Lalsangzuala Hmar hi MPL5-a Chanmari champion puitu a ni - hei vang hian August 3, Ningani tlaia an inkhel tur hian ngaihven a hlawh ang.

A hmuhnawm

Chanmari FC-in nung takin bul an ṭan a, ding­lama Mabiaa cross chu Rochhingpuia'n box pawn aṭangin goal ban a pet per nghal. Rhino tan Mizo tlangval Hmangaiha chu Chanmari tlarhnung tan buaina tham a tling a, minute 13-naa Hlimen tlangval ball pet chu Chanmari keeper Lalmuanawma'n a dang ṭha takzet.

MPL2-a Chanmari FC champion puitu captain Zothanpuia (Thangpuia) phirpui Hmingthansanga'n Rhino lam tan (Thangtea) mual chanve zet a khalh hnuah a hmawr a bawk ṭha lo a, tlar hmaa a kawppui Hmangaiha'n goal ban a pet per leh bawk.

Chanmari goal hmaah an vannei zawk a, Rhino defender tauh sual chu Mabiaa'n um lutin keeper PC Rema a tawn tlang hnuah minute 43-naah inkhela goal awm chhun a khung.

A hnu lam

Second half-ah inkhel hmuh­nawmna a tlahniam. Rhino forward Thangtea'n hnai tak aṭangin chance ṭha a hlah leh Chanmari substitute Lalruatfela'n Mabiaa pass goal zawna a pet theih lohte chu hun chanve hnu lama goal hlauhawm a ni deuh mai.

Rhino Charge-in Ni­ngani chhunah point la hmu lo Chanmari West an hmachhawn dawn avangin insiamṭhatna hun an nei a; Chanmari FC erawhin semifinal lut turin point tam an mamawh tawh lo.

Group B - Team Dinhmun
July 29, Inrinni - Rajiv Gandhi Stadium
Chanmari FC 4 - 0 Mizoram Police FC
CFC : PC Zosangliana 4', 49'; Jacob Vanlalhlimpuia 20'; C Lalrosanga 53'
Chhinga Veng FC 5 - 1 Chanmari West FC
CVFC : Malsawmfela 9'; MS Dawngliana 45'; Lalmawizuala 47' (OG); Laldampuia 69', 83'
CWFC : Lalnunmawia 30'
NIMIN INKHEL RESULTS - Lammual
Mizoram Police 2 - 5 Chhinga Veng
MPFC : Lalfakawma 3'; B. Zoramthanga 10'
CVFC : Malsawmfela 21', 76'; R. Laldinliana 52'; MS Dawngliana 62'; Lalkhawpuimawia 79'
Rhino Charge 0 - 1 Chanmari FC
CFC : Vanlalbiaa Chhangte 43'
August 3, Ningani - Lammual
12:15 PM Rhino Charge vs Chanmari West FC
02:30 PM Chhinga Veng FC vs Chanmari FC
August 5, Inrinni - Lammual
12:15 PM Chanmari FC vs Chanmari West FC
02:30 PM Mizoram Police FC vs Rhino Charge
August 8, Thawhlehni - Lammual
12:15 PM Chhinga Veng FC vs Rhino Charge
02:30 PM Chanmari West FC vs Mizoram Police FC
# Team Pld W D L GF GA GD Pts
1 Chhinga Veng FC 2 2 0 0 10 3 7 6
2 Chanmari FC 2 2 0 0 5 0 5 6
3 Rhino Charge 1 0 0 1 0 1 -1 0
4 Chanmari West FC 1 0 0 1 1 5 -4 0
5 Mizoram Police 2 0 0 2 2 9 -7 0