Goal khung thiam Chhinga Veng
Chhinga Veng FC-in Great Sports I Day Football-ah match hnih an khel tawh a, goal nga ve ve an khung. Nimin khan Chhingcows-in an club history-a Mizoram Police an hmachhawn hmasak berah 5-2 in an sawphnuah an comeback a ni.
Police phawt
Minute thumna lekah Chhinga Veng keeper Zothanmawia chetfuh tawk loh vangin Mizoram Police tan Lalfakawma'n goal hmahruai a khung. Minute sarih hnuah Police-in corner hmang
ṭangkaiin B. Zoramthanga hmangin goal hnihna an khung a, minute 10 lekah 2-0 a ni.
He goal hnih hi Chhinga Veng beng harhtu a ni - minute 21-naah Malsawmfela'n buai nuaih karah khungin Chhingcows tan beiseina a siam a, halftime-ah Police-in 2-1 in hma an hruai.
Inlehthalna
Second half-ah coach Lalsangzuala Hmar-in substitution awmze nei siamin Laldampuia leh Lalkhawpuimawia (Mapuia) te luhtirin inkhel kalhmang a dang hlak. Chhinga Vengin inkhel an thunun a, R. Laldinliana hmanga an si phurh an sut hnuah MS Dawngliana'n minute 62-naah hma hruaina goal a khung.
Police tan Lalbiakhlua'n an si phurh sut theihna hun ṭha a bawhpelh a, Chhinga Vengin Sawmfela leh Mapuia te hmangin goal hnih dang an khung belh leh bawk. Hun tawp lamah Chhingcows-in goal chance an ngah a, MFA Super Cup-a best keeper Lalṭanpuia zarah Police-in goal tam zawk an chhuah lo.