Neymar Engvangin nge Barca a chhuahsan ang?

Paris St-Germain nena sawizawm hlawh mek Neymar chu pre-season friendly match an khelh zawh hnuah Barcelona squad ruala Spain lama kir ve loin sponsorship chungchangah China lam a pan a, Qatari chanchinbu lar Al Watan chuan Qatar-ah PSG zawm tura medical nei turin a kal niin an sawi!

Hetiang boruak karah hian Barcelona chuan an player pawimawh Neymar chhuhsak tumtu Paris St-Germain chuan Brazil captain lei theihna zat pound maktaduai 198 an theh chhuak tak tak a nih chuan UEFA hnenah French club hi Financial Fair Play hmanga chhui turin an thlen dawn - Neymar leh PSG inhnaihzia nemnghehna vek a ni.

Miropuite sulhnu

Brazilian player ropui Romario, Ronaldo, Rivaldo, Ronaldinho leh Kaka-te hun a tawp a, an sulhnu chhui zo tur khawpa khawvelin a beisei chu Neymar hi a ni. Mahse, Brazil captain hi 'khawvela player

ṭha' huang chhungah chhiar hmaih a ni ngai lo chungin Brazilian player ropuite dawn tawh chawimawina a la dawn ve loh a awm a, chu chu ' FIFA World Player of the Year' chawimawina a ni.

Romario (1994), Rivaldo (1999) leh Kaka (2007) ten vawi khat ṭheuh khawvela football thiam ber dinhmun an lo luah tawh a, Ronaldinho-a'n vawi hnih (2004 & 2005) dawngin Ronaldo phei chuan vawi thum ngawt (1996, 1997 & 2002) a dawng bawk - Neymar hian he chawimawina hi vawi khat pawh a dawng lo a nih chuan Brazilian player ropui zingah sawi tel luih a harsa mai thei.

Eng nge tih tur?

Neymar-a'n club tan nomawi chawi theih ang ang chu a chawi kim a, mimal chawimawina dawng tur hian eng nge a tih ngai? tih chu zawhna awm a ni a, a chhanna hnaivai ber chu 'Barcelona chhuahsan' tih hi a ni. Real Madrid-in Champions League nomawi an chawi chuan Ballon d'Or chawimawina dawng turin Cristiano Ronaldo hming a lang chhuak nghal ṭhin a, chutiang chiah chuan Barcelona ropuina chu Lionel Messi thawhrahah khungkhawm vek a ni ṭhin.

Neymar hian club nomawiah a duhtawk a nih chuan Barcelona-a cham hi thutlukna dik a ni ang a, mimal chawimawina hun tlar a duh a nih erawh chuan PSG pan a fuh ang. Barca-a player ropui ber chu Messi a ni a, Neymar hian PSG a pan a nih chuan French club-a player langsar ber a ni ang. Brazilian forward hian Messi hliahkhuhna hnuaia awm reng nge ama 'Lal ram' din a duh zawk? tih chu duhthlan tur a neih chu a ni a, mahni club khelh meknaa 'a ṭha ber' pawh ni pha lo tan 'World Player of the Year' chawimawina dawn beisei chi a ni lo.

Player fing Neymar

Santos aṭangin Neymar-a'n khawvel hriat a hlawh a, FIFA U-17 World Cup Nigeria 2009 khelh a nih khan Santos tan senior team-ah player langsar a ni tawh. Mahse, Nigeria-ah Brazil-in beisei an phak lo a, tlarhmaa Neymar leh Philippe Coutinho chhawr thei ram hi group stage aṭanga petchhuah an ni. Hetihlai hian Neymar hi Europe club lian tak takten an hel reng tawh a, Nigeria hi a tan zirlai ropuiah a hmang.

Europe pan mai tura ngaih tawh rawlthar hian Santos-a cham chhunzawm a thlang a, an ram chhuahsana a tum ram thleng turin zir belh tur tam tak a la nei tih chu Nigeria aṭanga a zir a ni. Brazilian club-ah kum 2013 thleng a cham chhunzawm a, match 225-ah goal 136 a khung sak. A hun a tihah tak Europe a pan a, a thlen chin kan hria. Neymar hi Robinho ngaisangtu a ni. Kum 2005-a Robinho-a'n Real Madrid a pan khan 'khawvel player ṭha ber' chawimawina dawng turin Spain a panah ngaih a ni a, mahse a hun tawp lamah chuan Cristiano Ronaldo lakluh nana sum siam nan hman a ni - a ngaihsan Robinho anga a hun tawp lam hman Neymar hian a duh lo ang.

Barca buaina

Player-in an contract-a release clause (lei theihna zat) a neih zat anga club-in an lei chhuak ngam a nih chuan player neitu club lamin tih theih an nei lo a, player chhuah zalen mai chu an tih tur a ni. Catalan club hian Neymar chelh an duh bawk si a, Qatar enkawl club lamin pound maktaduai 198-a lei an inhuam bawk si avangin FFP hmachhuanin PSG hek an tum.

Kum 2011-12 aṭanga hman ṭan FFP regulations-ah chuan European club-te chu an lakluh aia tam sum transfer bazar-ah an hman phal a ni lo a, PSG hi 2014 khan heivang hian hrem an lo ni tawh. June 2015-a FFP dan siamṭhat a nih hnuah pawh club neitu chuan club sum 30% chu a sumdawnna kaltlanga a thawh a nih chuan chhui tur a ni ang - club te hi anmahni sum thawhchhuahaṭang veka inenkawl tura beisei an nih vang a ni ber.

Engtin zel?

PSG hian pound maktaduai 198 hian an duh phawt chuan Neymar hi an lei thei. Mahse, heti zata an lei a nih chuan FFP dan an bawhchhiat ngei a rinawm a, hei tak hi Barcelona-in UEFA hnena thlen an tum chu a ni. UEFA lam hotute chuan, "Club-te chu player lei an tumna kawngah kan dal ngawt thei lo. Mahse, player an lei hnuah FFP dan an zawm leh zawm loh en a ni ang a, hrem an ṭul a nih chuan kan hrem ang," an ti.

French club hi kum thum chhunga an sum hloh chu pound maktaduai 26.81 a tlin chuan hrem an ni dawn - Neymar an lakluh chuan an sum hlohin pound maktaduai 20 a chuanna chance hi a sang hle. Mahse, PSG hian Brazil captain lakluh an tumna lamah an player-te hralh chhuakin sum an chet kual tir ve daih thei a, Neymar man hi an player hralhna aṭanga an tuak ngah a nih chuan hremna an pumpelh thei.