Olympic 2024 thleng tur Paris
France khawpui Paris chuan Olympic 2024 a thleng dawn tih a hriat theih ta. Olympic 2024 thlen tuma an elpui Los Angeles chuan 2028 Olympic Games an tinzawn thu an puan tak avangin infiamna khawmpui lian thleng turin Paris hi puan la ni chiah lo mah se an thleng dawn tih a chiang thei tawh.
International Olympic Committee (IOC) chuan June thla khan heng khawpui pahnihte hi an insiamrem theih chuan Olympic thleng ve ve thei dinhmuna an din thu an puang tawh a, hemi hnu lawk hian Los Angeles lama hmalatu pakhat chuan 2024 Olympic chauh chu an tinzawn a nih loh thu a lo sawi tawh.
Thawhṭanni khan LA lam hian 2028 Olympic thleng tura thutlukna an siam thu an pawm a, IOC lam pawhin cheng tluklehdingawm 1.4 an pek tur chu an pawmsak nghal bawk.
Los Angeles mayor Eric Garcetti chuan, "United States-ah Olympic Games kan nei leh dawn ta, kum 2028-ah chuan he infiamna khawmpui lian hi LA-ah neih a ni ang," a ti. LA hian kum 1932 leh 1984 te khan Olympic hi an lo thleng tawh bawk a, a vawi thum nan he khawpui lian tak hian Olympic a thleng thei dawn tihna a ni.
Olympic hi infiamna dang ang lo takin khawpui hminga thlen a ni ṭhin, nikum khan South America-a a vawi khat nan Brazil khawpui pakhat Rio-ah nghah a ni a, kum 2020 chu Japan khawpui Tokyo-ah neih tur a ni bawk - September 13 hian IOC chuan Lima, Peru-ah Olympic 2024 thleng tur hi official takin a puang dawn.
Paris hian kum 1992, 2008 leh 2012 te khan Olympic thlen tumin IOC hnenah dilna an thehlut tawh a, an hlawhtling lo. Kum 2024 Olympic thleng tur pawh hian a tirah chuan LA bakah Boston, Hamburg, Rome leh Budapest te nen an inel a, a tawpah a vannei berah an ṭang. France khawpui hian kum 1924 khan Olympic hi a lo thleng tawh a, a kum za champhakah tak an thleng leh thei tur hi an lawmna a zual khawp ang tih a chiang.
Paris Mayor Anne Hidalgo chuan, "Paris leh Los Angeles te hi infiamna hmasawn nana zaikhat vua an ni a, kan duh leh beisei anga thil a kal thei tur hi kan lawm, hei hian a tihlan chian em em chu khawpui pahnih te leh IOC lam inbiakna a ṭha tih hi a ni," tiin a sawi.
IOC president Thomas Bach pawhin LA thutlukna siam chu a lawmawm a tih thu a sawi a, huaisen taka hun rei zawk an nghah ngamna hian rahṭha chhuahin an duh ang ngeiin Olympic an thlen ngei a beisei thu a sawi a ni.
An lungawi tlang?
LA hian an duh an hmu dawn a, an hma laknaah hlawhtling hleah an inngai ngei ang. Kum 2002 hnu lama a vawi khat nan United States ram chhunga Olympic an thleng leh tur hi lawm tur pawh a ni reng a ni.
Mahse, mi tam tak thlirna aṭang erawh chuan Paris hi hnehtu chan chang zawk an ni. Kum 2024 Olympic thlen tumin a tirah chuan LA, Paris, Boston, Hamburg, Rome leh Budapest te an inel a, heng thlen tum khawpui paruk zing aṭang hian France khawpui chuan an duh hun takah an chang thei dawn. Hetihlai hian IOC pawhin khawpui pahnihte dinhmun an chinfel sak theih avangin ngaihṭha takin an awm thei dawn bawk a ni.