Hlawh inang thlawptu Serena
Hmeichhe tennis player zinga sum lalut hnem ber Serena Williams chuan infiamna huang chhuangah chauh ni loin midum leh mingo nulan ten hna an thawhna hmunah hlawh inang neih a duh thu a sawi.
Tennis inelnaah chuan mipa leh hmeichhe hlawh a inzat a, vun rawng vangin hlawh hniam bik an awm lo bawk. United States-ah erawh midum hmeichhiate khuan mingo nula hlawh aiin 17% in an hlawh tlem zawk bawk a, lehkha zir chen inang leh hnathawh inangah pawh an hlawh tlem bik.
Grand Slam vawi 23 champion tawh Serena chuan, "Tennis court chhung leh a pawnah hnuaichhiah kan ni fo a, ka vun rawng vangin mi zah ka hlawh loin hun harsa leh hrehawm ka tawng ṭhin. Ka ngaihdan chuan kan hnathawh a inang a nih chuan lawmman pawh inang khat kan dawng tur a ni, mihang hmeichhiate hian an dikna chanvo hi huai taka an sawi chhuah ve pawh ka duh," tiin a sawi.
American star Serena hian nau a pai avangin Australian Open nomawi a chawi hnuah tennis a la khel leh rih lo a, a rawn kir theih hun tur hriat a la ni lo.